TURA: Ja·manchake koborko man·soani gitade, re·anggipa Mongolbar walo, adita mang mongmarang, North Garo Hills a·jani Baksalpara songo napenba, songni nok te·gni baksana manderangni bagan barirangko nisie galangaha.
Forest official-rangni kobor on·ani gitade, Mongolbar walni 11:30 bajimango, mang 30-mangni gita mongmarang, Kharkutta constituency-ni ning·o donggipa Baksalpara songona re·angenba, songni nok te·gniko aro manderangni gama ge·anirangko nisie galangaha indiba rasong gnange darangba saknaanirangko man·jaha.
“Mongmarangni nisie galanggipa nok aro bagan barirangko chinga nieaha aro manderangni noksan ong·aniko hisape donaha. Ia mongmarang da·o Baksalpara joloni ong·katange samba jolo donggipa songrangona re·angskaaha. Chinga obostarangko name nirikkienga,” ine Wildlife Ranger Annie Valentina Ch Marak parakataha.
Pangna bilsian mi minkarini somoirango cha·ani sandibaenggipa mongmarang, iandake songchi nokchi napenba, manderangni gam-jinrangko aro manderangko chadrape donanganirangko nikna man·rongengachim.
Badiaba badiaba biaprangode mongmarangni chadrapanio manderangni sianirangkoba nikna man·ahachim.
