SHILLONG: Meghalaya aro Assam a·dok damgnini simarango meligrikna man·jaenggipa biaprangoni mitamkode Krismasna skangan namatna man·gen ine a·dok sorkarini ku·rachakaniko chu·sokatna man·jahani gimin Congress dol suk ong·gijaniko parakatenba, iandake ku·rachakanirangko chu·sokatna man·gijaniara a·doko songdongenggipa manderangni sorkario ka·donganiko gimaatani gita ong·gen ine parakataha.
“Bang·a changon Krismasni somoirango iandake ku·rachakanirangko sorkari chu·sokatna man·rongjaenga. Uni gimin ku·rachakatangko chu·sokatna man·ja ong·ode skatang ku·rachakanirangko dakna nangja,” ine Bristibar salo Congress Legislature Party (CLP)-ni dilgipa Ampareen Lyngdoh parakataha.
Sorkarini donsogimin somoi gita kamrangko matchotatna pilakkon sorkari baksa bakrime kamko ka·china gitaba ua didiangaha.
Meghalaya aro Assam-ni meligrikna man·jaenggipa dam 12 biaprangoni damdok biaprangko namatna gita sorkarini somoiko ra·dapani gimin janapatengon, “Ia mongsonggipa kamko ka·anio darangba sorkariko bakkandikbegipa somoio matchotatchina drajaenganina anga kusi ong·a aro mikkangchide iandakgipa kamrangko ka·anio sorkari ching gita dakgipa manderangnaba u·iatchenggen ine anga ka·dongenga,” ine Lyngdoh aganaha.
Da·o dipet Congress dolni membor sakgnisan border committee-o membor ong·pae sorkarini kamrangni gimin ma·sienga indiba Congress dolni gipin dilgiparangde iani bidingo mamingkon ma·sipajaenga ineba CLP-ni dilgipa parakataha.