SHILLONG: India a·songni gipin biaprango ta·raken COVID-19-ni gital ‘Omicron’ rokom giproroengahani gimin Meghalaya a·dokoba ia kenbegnigipa sabisiko warachaksona gita ia gital 2022 bilsiode niamrangko rakbatatchina NCP-ni state president aro Gambegre-ni MLA Saleng Sangma, a·dok sorkariko didiangaha.
Sorkarikosan matnange dongaigija an·tangtangba nanga gita ja·kurangko de·samsoe an·tangtangko naljoke rakkichina gita ua a·dokni manderangkoba didiataha.
“Batanggimin bilsio ong·anggimin obostarangko nie ia 2022 bilsiode niamrangko rakbatatna nangengaha. A·doko songdongenggipa manderangba iana gipinrangko aro sorkariko matnange dongaigija an·tangtangan an·tangtangko naljoke rakkina gita nangenga. Ia sal somoirango an·ching pilakan smart phone aro TV-rang dongtokaha aro iarangko nie an·ching an·tangtangba an·tangtangko naljoke rakkina nanga,” ine Sangma aganaha.
Meghalaya a·dokona Omicron sokbae rang·san giproroahaode champengna man·jawaha ineba ua da·onin iana simsake aro mikrake dongchina gita manderangko didiataha.
A·songni gipin biaprango Omicron man·giparang bang·engahaoba da·onan tourist-rangni a·dokona re·baanirang bon·changkujaengani gimin suk ong·gijaniko parakatengon, a·doko Omicron rokomko champengsona gita ta·raken ja·kuko de·na nangengaha ine Sangma, a·dok sorkariko didiataha.
Assam a·doko night curfew-ko a·bachengattaiahani gimin Assam sorkariko mittelpile aganangengon, “An·chingni a·dokoba iandakgipa niamrangko ra·gatani somoi ong·engaha ine anga chanchia maina an·chingo sanna banani cholrang namen bilgribata,” ine Gambegre MLA parakataha.
Man·e cha·giparangnade sanna bananirangko ra·anio maming neng·nikanirang dongja ine janapatengon, kangal cholgrirangnade a·doko donggipa CHC, PHC ba civil hospital-rangoba cholrang namen komibata aro ia biaprango palangrang chu·ongja baksana namgipa doctor-rangba dongja ine Sangma parakataha.
