TURA: Bilsi gitalko maniani bak gita mijal Robibar salo, Meghalaya a·dokni Chief Minister aro South Tura constituency-ni MLA Conrad Sangma, constituency-ni ning·o donggipa dingtang dingtang gittimrangona re·ange ia gittimrango ra·gate ka·enggipa kamrangko niangaha.
South Tura constituency-ni Reserve Gittim-ona re·angani somoio ua gittimo rikenggipa retaining wall-ko niangaha aro ia retaining wall-ko sal 60-ni gisepon matchotna ka·dongenga ine Sangma parakataha.
Wachini somoirango Reserve Gittim jolo a·arang be·rongengani gimin ia biapo songdongenggipa manderang, retaining wall-ko rike on·china dabitokengachim ine nikna man·a.
Ia apsan salon ua Tura-o ong·atna sienggipa Day and Night CM Cricket Cup-na tarisoenggipa biapkoba niangjolaha. Ia cricket kal·susaaniko Tura-ni Police Parade Ground-o January jani gittamgipa anti dipet a·bachengatna sienga aro ia kal·susaanio Garo Hills gimikoni komibeoba dol 100-mangni gita cricket kal·gipa dolrang bak ra·angnaba gnang ine ka·dongsoenga.
Iana skang, ua Tura jillani Nabinpally gittimonaba re·ange jolo songdongenggipa manderangna bilsi gitalni namgipa skaniko on·eaha aro ia gittimo songdongenggipa manderangba rama tarichina dabitokengani gimin kamrangko bakan a·bachengatgnok ine chief minister, gittimni manderangna ku·rachakaniko on·angaha. Rama tarina sienggipa biapko ua engineer aro contractor-rang baksa niangjolaha aro kamko ta·raken matchotatchina gita contractor-na ge·etaniko on·angaha.
Ia apsan salon ua Beldarpara gittimonaba re·ange ia gittimona tariangenggipa rama aro nalarangko niangaha aro kamrang ta·rakengani gimin sal 30-ni gisepon matchotna ka·dongenga ine parakataha.
