SHILLONG: Nagaland a·doko Armed Forces (Special Powers) Act (AFSPA)-ko jadokna ra·dodapattaina manchiahani gimin Robibar salo, Meghalaya a·dokni Opposition Congress dol aro MDA sorkario bak ong·paenggipa United Democratic Party (UDP)-ba ma·mong sorkariko sing·doangaha.
Iani bidingo kobor ra·timgiparang baksa agangrikengon, Nagaland a·doko AFSPA-ni a·sel adita salrangna skangsan dosgri manderang sipai dolrangni jako so·otgalako man·ani ja·manoba AFSPA-ko ra·dodapna gita ma·mong sorkarini manchianiara namen kragijani ong·aha ine Congress Legislature Party (CLP)-ni dilgipa Ampareen Lyngdoh parakataha.
“Salgro salaram a·dokrango songdongenggipa manderang, ia ka·namgijagipa niamko ra·galchina dabitokengoba ma·mong sorkari, manderangni dabianiko knachakna gisiko nangjaenga. Ia niamni a·selan salgro salaramni bang·a biaprangon manderang duk saknaanirangko chakna nangtokengani gimin da·o salgro salaramni dilgiparang iani bidingo apsan bakrime ku·rangko on·na nangengaha,” ine Lyngdoh parakataha.
Apsan daken, UDP-ni general secretary Jemino Mawthoh-ba AFSPA-ko ra·galna nangchongmotenga ine parakataha.
“Sipai dolrango manderang ka·dongchakna man·genchimosa manderang naljokanikode man·na amgen. Ia sal somoirangode salgro salaram a·dokrango bobil dake chakatanirang skango gita ong·jaha aro iandake bobil dake chakataniko warachakna gitade nambata ja·kurangko de·na nangenga. Bobil dake chakatgipa dolrangko warachakanio dosgri ramram manderangde saknaanirangko man·na nangja,” ine Mawthoh aganaha.
Salgro salaram a·dokrangko uamang so·otchakram a·ba ong·atna nangnikja ineba UDP-ni general secretary parakataha.
Mawthoh-ni parakatani gitade, da·o dipet salgro salaram jolo donggipa chonchongipa Tribal jatrang tom·tome janggi tangenggiparangan ong·achim.
Iana skang, Nagaland a·doko AFSPA-ko jadokna ra·dodaptaina ma·mong sorkarini tik ka·ani bidingo a·dokni Chief Minister-ba janapatengon, ia niamko jadokna ra·dodaptaigenchimoba ia niamko ra·galpilna man·aigen ine parakatahachim.
Re·anggipa December-ni 4 tariko Nagaland a·dokni Mon a·jao dosgri sak 13 manderangko sipai dolrangni so·ote galani ja·mano Meghalaya a·dokni Chief Minister baksana salgro salaramni dingtang dingtang dilgiparangba ia AFSPA-ko salgro salaram a·dokrangoniko chu·gimik ra·galchina dabiangahachim ine nikna man·a.
