SHILLONG: Meghalaya aro Assam a·dok damgnini simarango meligrikna man·jaenggipa biaprangoni damdok biaprangko namatchengna kam ka·anio ia a·dok damgnini regional committee-rang, Sombar salo an·tangtangni report-rangko pakwate on·grikangaha.
Koborko on·ani gitade, Sombar salo Meghalaya a·dokni Deputy Chief Minister Prestone Tynsong aro Assam a·dokchipakniba Cabinet Minister P Hazarika, apsan tom·enba, ia regional committee-rangni report-rangko on·grikangaha.
Ia regional committee-rangni report-rangko on·grikangani bidingo kobor ra·timgiparangna u·iatengon, a·dok damgnini songe on·gipa regional committee-rang, an·tangtangni tarigimin report-rangko pakwate on·grikmanahani gimin da·o a·dok damgnini dilgiparang, ia report-rangko nie nanga gita ja·kurangko de·angna man·gnok ine Meghalaya a·dokni Chief Minister Conrad Sangma parakataha.
“A·dok damgnini dilgiparang apsan gronggrike report-rangko on·grikangan baksana talbate agangrikna man·aha aro da·o a·dok damgnini simarango meligrikna man·jaenggipa biaprangoni damdok biaprangkode chinga bakan namatna ka·dongenga,” ine Sangma aganaha.
Ia report-rango janapanirangko parakna jechakatengon, bakan a·dok damgnini chief minister-rang apsan asonge agangriktaigen aro unon skanggipa bako damdok biaprangko namatna gita ja·kurangko de·na man·naba dongaha ine Chief Minister parakataha.
Mongolbar salo Kamrup a·ja aro West Khasi Hills a·jani regional committee-rang, Guwahati songjinmao tom·e chanchirimangtaigen ineba Sangma parakataha.
Chief Minister-ni u·iatani gitade, Meghalaya a·dokni PHE Minister Renikton Tongkhar, Assam-ni Minister Atul Bora-ko gronge apsan chanchirimanggen.
East Jaintia Hills a·jani regional committee basako report-ko on·na miksongenga ine sing·on, Krismas aro gital bilsi maniani a·sel ia regional committee, una report-ko on·na man·kujaenga ine Sangma parakataha.
“Report-ko chinga bakan man·na ka·dongenga indiba report-ko man·gijaba chinga East Jaintia Hills a·jani simarango donggipa biaprangni gimin chanchimanahani gimin uamangni report-o janapanirangko chinga ma·sisona man·aha,” ine Chief Minister aganaha.
A·dok damgnini simarango meligrikgijaniko mai tariko namatna man·gen ukode aganna man·jawa ineba Sangma talataniko on·angaha.
Meghalaya aro Assam a·dokni simarango meligrikna man·jaenggipa damn 12 biaprangoni skanggipa bako damdok biaprangkode da·o January 15 tarikni gisepon namatna ka·dongenga ine adita salrangna skangsan a·dokni Deputy Chief Minister Prestone Tynsong aganahachim.
