SHILLONG: Meghalaya a·dokon nambatgipa MLA-rang donga ine National People’s Party (NPP)-ni state president aro Rajya Sabha-ni MP WR Kharlukhi, a·dokni MLA-rangko mittelpilangaha.
Kharlukhi-ni parakatani gitade, Assembly session-rango opposition dolrang ong·kate katgenchimoba Meghalaya a·dokni bilsi 50 gapanio changsaba session-rangko champenganirangde dongkujaengachim.
“Assembly-ni session-rango mainaba suk ong·nikjagenchimode opposition dolrang ong·kate katronga indiba indinaride Assembly-o pangnan a·dokna aro a·doko songdongenggipa manderangni namgnini giminsa agan-chanchirimanirangko dakrongaia,” ine ua aganaha.
Assembly-o MLA-rang, saksa sakgipin baksa jegrikronga indiba maming saloba session-kode golmal ka·rongja ineba Kharlukhi aganaha.
“Anga an·tangde Assembly-o napna chol man·pakuja indiba MLA-rangni kamna anga rasong chaa,” ine ua aganaha.
Constitution-ni Eighth Schedule-o Khasi aro Garo ku·sikrangko ra·gatani bidingo parliament-o aganna cholko on·ahani gimin ua dingtangmancha Rajya Sabha-ni chairman-koba mittelpilangaha.
“Iani bidingo anga ku·rangko on·na jotton ka·a changantian opposition membor-rang aganseke galronga aro ian gimikkon golmal ka·a gita ong·rongaia,” ine Meghalaya a·dokni Rajya Sabha MP aganaha.
Meghalaya a·dokode iandakgipa obostarang ong·ja ine janapatengon, “Iani giminsa anga an·chingni a·dokon nambatsranggipa dilgiparang donga ine aganenga,” ine Kharlukhi aganaha.
Parliament session-ko a·bachengpiltaiahaon ua Khasi aro Garo ku·sikrangko Eighth Schedule-o ra·gatna nangengani gimin ku·rangko on·taigen ineba NPP-ni state president parakataha.
