TURA: State Bank of India (SBI) Betasing branch-ko gipin biapona apjitangna tik ka·engani gimin A·chik Holistic Awakening Movement (AHAM) Betasing regional unit aro AHAM Ampati zone-ni gita jegalatenba, ia bank-ko apjitangna sienggipa gital biapara State Highway (SH-12) ramani gonggegipa biaposa ong·e manderangna kenchakna nangani ong·gen aro ia biapo gari gorarangko donchakani biaprangba dongjani gimin manderang neng·nikanirangko chagrongna nangtokgen ine talataniko on·angaha.
AHAM-ko dilgiparangni u·iatani gitade, ia SBI Betasing branch-ko gipin biapona apjitangjachina gita batanggimin somoirangoba uamang South West Garo Hills a·jani Deputy Commissioner aro Tura Chandmary-o donggipa SBI regional business office-ni assistant general manager-na sedoatahachim indiba AHAM-ni jegalaniko knachakgija bank-ni official-rang, ia branch office-ko Betasing bazar-ona apjitangna tik ka·engahachim.
“Ia SBI Betasing branch-ko Betasing bazar-ona apjitangna tik ka·aniara 2019 bilsio Regional Business office-ni bank office-na tender on·ani gitaba ong·srangjaenga maina uamangni tender-o janapani gitade, office mikkango feet 40 biaprang dongna nangachim indiba da·o uamangni apjitangna sienggipa biapde biaprangba dongsrangja aro gari gorarangkoba donchakna gita biaprang dongsrangja,” ine AHAM Betasing aro Ampati-ni dilgiparang parakatenba, ia gital biapara rama gonggegipasa ong·ani gimin manderangnaba kenchakna nangani ong·gen ine talataniko on·angaha.
Ia biapko gipin jatni mande, 1993 bilsio Meghalaya Land Transfer Act 1972-o dongimin niamko pe·e a·a pattako tarie ra·aha ineba AHAM-ni dilgiparang matnangataha.
“Iani bidingoba chinga am·sandianirangko dakna a·bachengengaha aro niam gri dakaniko rim·a man·genchimode Meghalaya Land Transfer Act 1972-o pangchake nanga gita ja·kurangko de·anggen,” ine AHAM-ni dilgiparang parakataha.
