SHILLONG: India a·song gimikon bilsi 15-oni bilsi 18 ong·gipa chadamberangko Sombar sal dipet COVID-19-ni tikako su·na a·bachengatahani gimin Meghalaya a·dokoba apsan daken tika su·aniko a·bachengataha aro ia tika su·aniko a·dokni Deputy Chief Minister Prestone Tynsong, East Khasi Hills a·jani Rynjah PHC-o a·bachengate on·angaha.
Tikako su·e ra·chenggipa chadamberangoni Tynsong-ni demechik aro UDP-ni general secretary Jemino Mawthoh-ni demechikgipaba skanggiparangoni ong·aha aro tika su·aniko a·bachengatani ja·man Meghalaya a·dok gimikon bilsi 15 batgimin chadamberangni tika su·e ra·na gita health centre-rango aro tika su·chakgipa biaprango tom·chimonganiko nikna man·aha.
Union Health Ministry-oni u·iatani gitade, bilsi 15-oni bilsi 18 ong·gipa chadamberangko tika su·anio 2007 bilsini January 1 tarikna skang atchigipa chadamberang tikako su·e ra·na man·enga aro ia chadamberangna Bharat Biotech-ni tarigipa ‘Covaxin’ tikako su·enga.
Bilsi 15-oni bilsi 18 ong·gipa chadamberangko January 3 tarik dipet tikarangko su·na a·bachengatahaon ja·delgimin aro bilgrigipa manderangnade tikani gittamgipa pongko January 10 tarik dipet su·na a·bachengskagnok ineba Health Ministry-oni u·iataniko on·angaha.
Indake ong·engon, Tura-ni wilwilao bilsi 15-oni bilsi 18 ong·gipa chadamberangna da·al January-ni 4 tariko Matchakolgre Community Hall, Matchakolgre LP School, Baldora SSA School aro Araimile Community Hall-o Covid-ni tikarangko su·enga ine health official-rang u·iatenba ia jolrango donggipa chadamberangko an·tangtangni sepangbatgipa centre-ona re·ange tikako su·e ra·rikchina didiataha.
Tika su·na re·baengon, skulni identity card, ration card, Aadhar card, passport, bank passbook ba unique disability ID-ko ra·bana nanggen ine health official-rang u·iataha.
M’laya a·dokoba bilsi 15-oni bilsi 18 ong·giparangko tika su·na a·bachenga
Date:
Share post:
