SHILLONG: Adita salrangna skang, East Jaintia Hills a·jani Iapmala songo gital bilsiko maniani bak gita jinma ale cha·anio wak be·enko cha·e saa man·gipa manderangoni bang·batan da·o namkalengaha ine Mongolbar salo, Khliehriat-ni MLA aro a·dokni Cabinet Minister Kyrmen Shylla parakataha.
Koborko on·ani gitade, Iapmala songo gital bilsiko maniani somoio manderang wak be·en cha·ani ja·man chigalna a·bachengtokaha aro Robibar walode diarrhoea saaniko man·tokahachim.
Saa man·gipa manderangoni bang·batakon ja·mano sanna gita Khliehriat CHC-ona ra·angahachim.
Indake ong·engon, saa man·gipa manderangoni bang·batan da·o namkaltokaha indiba uamangko health department-ni manderang nirokkuenga ine Khliehriat MLA parakataha.
“Da·o Khliehriat health centre-o sak 11 ba sak 12-mangni gita manderangko done sanengkua indiba uamangko bakan watpilgnok,” ine Shylla parakataha.
Khliehriat MLA-ni parakatani gitade, ia a·selni bidingo kobor man·soa bakan Rymbai PHC aro Kyrmen Foundation-oniba manderang re·bae songni nokni manderangna pilak nanga dakchakeanirangko on·angaha.
Jinma ale cha·anio saa man·gipa manderangoni bang·batan butchuma budeparang aro bi·sarangsa ong·bata ineba Kyrmen parakataha.
Maini a·sel ia manderang saaniko man·tokaha, uko ma·sina gita health official-rang aro food official-rang, am·sandina gita cha·anirangko ra·angaha ineba Khliehriat MLA parakataha.
A·sel ong·ani somoio pilak nanga dakchakanirangko on·ahani gimin songni dilgiparangko, health official-rangko aro joltangni MDC-koba mittelpilataha.
