SHILLONG: University of Science & Technology Meghalaya (USTM)-ni jako ra·gipa Jorbil songni bi·sarangna lekka porako on·anio Punjab National Bank (PNB) Guwahati zonal office-ni gitaba dakchakanirangko on·na ku·rachakangaha.
Ri Bhoi a·jani Jorbil songo aro ia songni wilwilao namroro silroroaniko ra·bana gita ia songko University of Science & Technology Meghalaya (USTM) jako ra·gen ine adita salrangna skangsan parakatahachim.
Indake ong·engon, ia songni bi·sarangna aro mongsongbate me·chikrangna lekka porako on·anio PNB-ni gitaba USTM-na dakchakanirangko on·gen ine PNB Guwahati zonal office-ni general manager Shio Shankar Singh parakatskaaha.
“Songsalo dingtanganiko ra·bana gita bank aro university apsan nangrime kamko ka·na man·gen aro songni me·chik bi·sa sakantinan lekka porako on·na gita chinga daitoko ra·gen,” ine Singh parakataha.
Songadam nokadamrango donggipa chatro chatrirangna lekka porako on·na kamrangko ka·engani gimin ua dingtangmancha USTM-ni Chancellor Mahbubul Hoque-koba mittelpilangaha.
