SHILLONG: Meghalaya a·dokoba COVID-19-ni Omicron-ko man·gipa manderang dongahani gimin a·dok sorkari, dingtang dingtang niamrangko ra·gatna a·bachengtaiengahaon, ia sabisini giproroaniko champengna kam ka·anio manderangni janggi tanganiode maming neng·nikanirangko ra·baskajachina gita a·dokni All India Trinamool Congress (AITC) president Charles Pyngrope, a·dok sorkariko didiataha.
“Meghalaya a·dokoba Omicron-ko sakbonga manderang man·ahani gimin sorkari, dingtang dingtang niamrangko ra·gatanichi ia sabisini giproroaniko champengna kam ka·gen ine chinga ma·sie indiba manderangni janggi tanganio maming neng·nikanirangko ra·bagija sabisini giproroaniko champengchina gita anga a·dok sorkariko mol·molenga,” ine Pyngrope aganaha.
Private garirangna salsa even nombor aro salsa odd nombor dake on·aninaba Pyngrope, an·tangni namnikpaaniko parakatah indiba batanggimin bilsignini gisepo manderangko salruragipa bus, taxi, auto aro uandakgipa garirangni nokgiparang noksan ong·atako man·na nangahani gimin da·o dipet para salgiparangnade niamko donkujachina gita sorkariko didiataha.
“Private garirangko skatang re·rurana on·gija 2020 bilsionin ia niamko ra·gatna nangachim maina private garirangni nokgiparangba mande salruragipa para garirangon re·rurana man·aia,” ine ua aganaha.
Meghalaya a·dokona re·napbaenggipa manderangko RT-PCR-ni negative test report-ko mesokchina ba entry point-rango porikka ra·china gita sorkarini niamko donatahani giminba ua an·tangni namnikpaaniko parakataha.
“Ia niamko donatani a·sel adita neng·nikanirangko man·naba gnang indiba iandakgipa obostao manderangni namgninan ia niamrangko sorkari ra·gatna nangenga ine manderangba ma·sichakna nanga,” ine Pyngrope aganaha.
Social media-rango tol·e jangbingbangatanirangko bebera·jachina manderangko didiatengon, sorkarini dongimin pilak niamrangko ja·rikchina gita ua a·doko songdongenggipa manderangko didiataha.
“An·chingni COVID-19 sajinmako warachakani bon·kujaengani gimin an·ching mikrake donganiko watgalna man·kujawa,” ine ua aganaha.