SHILLONG: East Jaintia Hills a·jao donggipa Sonapur dolongo be·sriani chinrangko nikna man·engahani gimin ia dolongko taridapna gita ta·raken ja·kuko de·china a·dokni PWD (Roads) Minister aro Deputy Chief Minister Prestone Tynsong, National Highway Authority of India (NHAI)-ni official-rangna ge·etaniko on·ataha.
Budbar salo NHAI-ni project director aro PWD (Roads)-ni official-rang baksa tom·e chanchirimangani ja·man kobor ra·timgiparang baksa agangrikengon, ia Sonapur dolongo be·sriani chinrangko nikna man·engahani gimin mikkangchi manderangna kenchakna nanganirang dongjana gita ia dolongko ta·raken taridapchina gita ua NHAI-ni official-rangna ge·etaniko on·ataha ine Tynsong parakataha.
“Iani bidingo am·sandianirangko dake ta·raken ja·kuko de·china anga NHAI-ni project director-na ge·etaniko on·ataha,” ine PWD (Roads) Minister aganaha.
Delhi-oni official-rangba da·o a·dokona sokbaaha aro ia dolongko name nina gita Sonapur-ona re·angengaha ineba Tynsong parakataha.
Ia dolongara East Jaintia Hills a·ja gita jokangenggipa Lukha chibimako kabatgipa dolong ong·achim aro ia metre 100-mang ong·e bakrogipa dolongko Army BRO rikahachim.
Ia dolongo be·sriani chinrangko nikna man·engani gimin manderangna maming kenchakna nanganirang dongjana gita East Jaintia Hills district administration, re·ruraenggipa garirangna niamrangko donatmanaha ineba Tynsong parakataha.
