SHILLONG: Meghalaya a·doko COVID-19-ni gital Omicron rokomko man·gipa sakbri manderangoni sakgittamde nampilna man·aha aro da·o saksasan dongaiaha ine Health Services (MI)-ni Director Dr Aman War parakataha.
“A·doko Omicron positive ong·gipa manderangoni sakgittamde nampilahani gimin da·o saksasan dongaiaha. Uni gimin an·ching iana kenjagokna nangjawa. Omicron man·e dongenggipa mande saksakoba chinga dingtang donenga aro da·o dipet ua namen dongengani gimin ua bakan nampilgen ine chinga ka·dongenga,” ine Dr War aganaha.
Assam-oni re·bagipa mande saksani Omicron positive ong·gipani gimin janapatskaengon, ua Shillong tong·saonin songtangchi re·angpilaiaha ine Dr War parakataha.
“Ua December 21 tariko Umpling-ona sokbaaha aro uni sample-ko apsan salon ra·aha. Shillong tong·saona sokbaani ja·man ia bilsi 13 ong·gipa bi·sa, an·tangni ma·a paarang baksa re·angpilaiaha. Uamang Langkyrding-o donggipa hotel-ko book ka·ahachim indiba hotel-ona sokbajaha. Ia bi·sani bidingo chinga Assam-ni official-rangna u·iataha,” ine Health Services (MI)-ni Director aganaha.
Dr War-ni parakatani gitade, Happy Valley-oni Omicron man·gipa me·chik saksaba da·o nampilangengaha. “Ia me·chik Qatar a·songoni re·baaha aro December 29 tariko positive ong·ahachim. Ia me·chik positive ong·ani ja·man uko dingtang donate genome sequencing-ko dakaha aro uni report January 4 tariko sokbaaha. Uaba Omicron positive ong·ahachim,” ine Dr War aganaha.
Ia me·chikko skanggipade uni nokon dingtang napate donachim indiba ja·mano ua corona care centre-o dongna bi·ahani gimin uko corona centre-o donatskaaha ineba Dr War aganenba, ia me·chikko salsa salgnini ja·manon watpilgnok ine parakataha.
Dr War-ni parakatani gitade Omicron man·e dongkuenggipa mande saksara Laitumkhrah-oni ong·a aro da·o dipet uo maming chinrang dongja aro uko dingtang napate donenga.
Omicron rokomna kenjagokjachina gita manderangko didiatengon, sorkarini donatgimin niamrangko manderang manijagenchimode sorkari rakbata niamrangko ra·gatna nangnaba gnang ine Health Services (MI)-ni Director parakataha.
“An·ching niamrangko ja·rikgenchimosa ia sabisini giproroaniko champengna man·gen,” ine ua aganaha.