WILLIAMNAGAR: Meghalaya a·dokoba COVID-19-ni Omicron rokomko man·giparang dongahani gimin a·dok sorkari, niamrangko ra·gate on·angtaiahaon, East Garo Hills a·jaoba ia sabisini giproroaniko champengsona gita East Garo Hills a·jani District Magistrate Swapnil Tembe, Meghalaya Epidemic Disease, Covid-19 Regulations 2020-ni regulation 3 baksana Section 144 CrPC-ko ra·gatenba, night curfew-ko walni 10:00 bajioni pring 5:00 bajiona ra·gate on·angtaiaha.
East Garo Hills a·ja gimikon jinma tom·bimonganirangkoba champengataha aro bia ka·anirangoba nokningode biap chakani 50 percent aro bangbangode sak 100-na batgija tom·na gita niamko donangtaiaha.
District Magistrate-ni u·iatani gitade, mande sianirangoba sak 50-na bate manderang tom·na man·jawa.
Gipin biaprangoni re·baenggipa manderang, entry point-rango konta 72-ni gisepo porikka ra·e negative ong·ani report-ko mesokna nanggen ba ong·jaode entry point-rango porikka ra·e nina nanggen ineba District Magistrate u·iataha.
