TURA: Jasana skang, Garo Hills Autonomous District Council (GHADC)-ni Taxation department-o enforcement officer aro superintendent ong·e kamko ka·enggipa manderangni gisepo tangka on·grikani video-ko TNT licence-na tangka dabie ra·enga ine matnange social media-o watatani ja·man manderangni gisepo adita ma·sisretanirang ong·angaha.
Ia video-o Mahendraganj jolni officer ong·e kamko ka·enggipa Dibakar Koch-ni Taxation superintendent DK Sangma-na tangka on·ako nikna man·ahachim aro iako mitam manderang tangka dabie ra·enga ine matnangenba, social media-rango mesokatskaahachim.
“Angni officer ua somoio tangka nangengani giminsa anga una on·atmitingko bal·ekjoljol video ka·rikaha indiba ia video-o TNT licence-na tangka dabienga inede maming janapa dongjachim. Saobarangsa iako ong·gija dake gipataha. Angni phone-ko re·anggipa jao cha·uaha aro iani bidingo anga FIR-ko ka·aha,” ine ia video-o ku·rang on·gipa Dibakar Koch parakataha.
Ia video-ko social media-o watpripraatani ja·man ia a·selni bidingo inquiry-ko dakchina gita Tura-ni BJP dolba dabiangaha.
Indake ong·engon, uni bimingko nisan ka·e district council office-koba ong·siatna gita ia tol·gipa video-ko social media-o watatgipa manderangni kosako, Taxation department-ni officer-ba badi ka·doangaha.