SHILLONG: Hyderabad-oni bilsi 23 ong·gipa mande saksa, East Khasi Hills a·jani Sohra jolo donggipa auchakani pokkrio sripe siaha ine Bristibar salo police officer saksa kobor on·aha.
Police officer-ni u·iatani gitade, bilsi 23 ong·gipa Pawan Kumar, an·tangni ripengrang baksa Nongriat samba jolo donggipa Blue Lagoon pokkrio jroe roengachim indiba ua somoio ua rasong gribee sripe siaha.
Ja·mano uni manggisiko uni ripengrang, Tyrna songo donggipa manderangni dakchakanichi chioniko ra·ongkatna man·aha.
Nongriat-o ong·telaigipa pokkri aro bolni jal·langko bilsiantian a·gilsakni dingtang dingtang biaprangoni bang·bea manderang nina gita re·barongachim.
Ia a·selni bidingo police-rang name am·sandina a·bachengataha ineba police officer parakataha.
