SHILLONG: Jaintia Hills Autonomous District Council (JHADC)-o tangka paisarangko jakkalsreta ine matnanggipani bidingo audit ka·ani report-ko Directorate of Local Fund Audit (DLFA), a·dok sorkarina pakwate on·manaha.
“JHADC-ni audit report-ko chinga re·anggipa 2021 bilsini December 23 tarikon, District Council Affairs (DCA) department-na on·manaha,” ine Bristibar salo official-rang, kobor ra·timgiparangna parakataha.
Audit ka·anio man·gipa mitam bakrangni gimin talataniko on·angengon, Special Assistance Grant (SAG) scheme-ni ning·o man·sogipa tangkarangko JHADC-o kam ka·giparangni dormaharangko on·na gita jakkalchengaha ine nikna man·aha ine official-rang parakataha.
“SAG-ni mitam tangkarangkode JHADC on·pilaha ine chinga nikna man·aha indiba uamang chu·gimik tangka paisarangkode on·pilkujaenga,” ineba official-rang parakataha.
1994 bilsion primary skulrangko chalaina gita a·dok sorkari jako ra·manahaoba JHADC-ni gita skigiparangna kamko on·engkua ineba official-rang parakataha.
“JHADC-o bang·a tangka paisarangkon ia skigiparangni dormaharangko on·na gita jakkalenga. Primary skulrangko chalaianiara da·o a·dok sorkarini jakosa ong·engahaon maikai uamang skigiparangna kamrangko on·engkua, uani bidingo JHADC, aganchakaniko on·na nanggen,” ine official-rang parakataha.
Indake ong·engon, 2020 bilsini November 10 tariko a·bachengatgipa GHADC-ni account-rangkode da·oba audit ka·a matchotkujaenga ine official-rang parakataha.
“GHADC-ni account-rangko audit ka·aniara dal·begipa kam ong·ani gimin audit ka·aniko matchotna gita somoiko nangenga. Chinga GHADC-ni account-rangko February jani gisepode matchotatna jotton ka·enga,” ine official-rang aganaha.
GHADC-o kam ka·giparangni kamrangko dontongate jingjengatahani a·selba account-rangko audit ka·anio ja·manchakatako man·ahachim.
Ia district council damgnion, bilsi 10-ni account-rangko DLFA-ni gita audit ka·engachim.
Koborko on·ani gitade, GHADC aro JHADC-na ma·mong sorkarini chamatgipa gong kror 264 tangkarangni giminsan ong·aigija batanggimin bilsi 10-ni gisepo ia district council damgnini account-rangko am·sandichina gita sorkari ge·etaniko on·ahachim.
