SHILLONG: Meghalaya a·doko porikka ra·e nianirang komiangahani gimin ma·mong sorkari jajrengchakaniko parakatenba, COVID-19-ni gital Omicron rokomna porikka ra·aniko bariatchina gita a·dokko didiataha.
Adita salrangna skangsan Meghalaya a·dokoba sakbonga manderang Omicron positive ong·ahachim indiba ia sakbongaoni sakgittamde nampilahani gimin aro saksade Assam-ona re·angpilahani gimin da·o positive ong·giparangoni saksasanahachim. Ia pilak manderangan gipin a·songrangoni re·bapilgipa manderang ong·achim.
Indake ong·engon, Meghalaya a·dok baksana Bihar, Jammu & Kashmir, Mizoram, Odisha, Punjab, Tamil Nadu, Uttarakhand aro Uttar Pradesh a·dokrangoba porikka ra·aniko bariatchina gita ma·mong sorkari u·iataha.
Iani bidingo u·iataniko on·atengon, chu·onga gita porikka ra·e niani dongjagenchimode joltangtango sabisini giproroaniko ma·sina man·jawa ine Union Health Minister-ni Additional Secretary Arti Ahuja, chittio parakataha.
A·song gimikon Omicron-ko man·giparang batrorobaengon ia a·dokrango porikka ra·e nianirang komienganiara jajrengna nangani ong·enga ineba ua parakataha.
Chu·onga gita porikkarangko ra·e nian baksana ia a·dokrango chu·onga gita porikka ra·ani bosturangko donchina aro gipin nanggipa bosturangko donchina gita Ahuja u·iataha.
India a·songo Omicron-ko December-ni 2 tariko skanggipa changna man·chengahachim aro da·o ia sabisi a·songni dam 26 a·dokrangona gipangahachim.
