TURA: Re·anggipa Budbar attamchibara Mendipathar-o donggipa Super Energy Point petrol pump-ona re·ange ia petrol pump-o kam ka·giparangko chadrapaha aro petrol-rangko rue kataha ine matnangenba, Garoland State Movement Committee (GSMC)-ni adita sak dilgiparangko rim·ani ja·man ia petrol pump, manderangoniko cha·boke ra·engani giminsa ua somoio GSMC-ni dilgiparang, petrol pump-ni manager-rangko bichal ka·na re·angahachim aro GSMC-ni kosako uamangni FIR ka·aniara tol·e FIR ka·anisan ong·aia ine GSMC-ni dilgiparang parakatskaaha.
GSMC headquarter-ni assistant general secretary Cyril A Sangma-ni parakatani gitade, ru·uta somoirangonin ia petrol pump-o manderangna komibate petrol-rangko on·enga aro manderangni tangka gama gita torangko on·jaenga ine baditaba chang manderangni badi ka·aniko man·ahani giminsa Budbar salo GSMC-ni dilgiparang, jolni NGO-rang baksa ia petrol pump-ona re·ange, petrol pump-ni manager-rangko bichal ka·eon, uamang GSMC-ni dilgiparangko songgigrikna jotton ka·ahachim. Indake ong·genchimoba, ia petrol pump-ni manderang, bang·a changon manderangko cha·bokahani gimin GSMC-ni dilgiparang, uamang baksa songgigrikna jechakon, uamang GSMC-ni dilgiparangkosa tol·e FIR ka·pangpilskaaha ine GSMC-ni assistant general secretary parakataha.
“India a·song gimik dam 60,000-oni dam 70,000-mangni gita petrol pump-rang donga aro Meghalaya a·dokoba dam 124 IOC, dam 44 Bharat Petroleum aro dam 24 Hindustan Petroleum-ko man·chape gimik dam 197 pump-rang donga. A·doko petrol pump-rang bang·an baksana damrangba salantian batroroengon, ramram manderangsa neng·nikanirangko chagrongna nangtokenga. Petrol-ni damrangko sorkarini bariatachide manderang noksan ong·atako man·jaenga indiba iandake petrol pump-rango manderangko cha·boke ra·anichi bang·an noksan ong·atako man·na nangtokenga. Ia apsan obosta an·chingni North Garo Hills a·jao donggipa Mendipathar petrol pump-oba ong·engachim aro cha·bokako man·enggipa 99 percent-ni gitade, iarangni gimin name ma·sitokjaengachim,” ine GSMC-ni dilgipa parakatenba, iandake petrol pump-o cha·bokani GSMC-ni dilgiparangna changni chang u·iatahani giminsa unsalo GSMC-ni dilgiparang, jolni NGO-rang baksa ia petrol pump-o kam ka·enggiparangko bichal ka·na re·angahachim ine talataniko on·angaha.
