SHILLONG: Rongsak Rangmalgre songna Sorkarini on·gipa JJM scheme-ni kamrangko name ka·e on·ja ine Rangmalgre songni manderangni matnange agananiko man·soani ja·mano chinga re·ange nieaha aro uan bebe kamrangko namdake ka·e on·jaha ine chinga mirontangchin nikbaaha, iani bidingo DC-na badi ka·genchimoba re·ange nirokeja ine songni manderangni matnangani kakketan ong·a ine dolsa A·chik NGO- Niksamso A·chik Society (NAS) aganaha.
“Chinga iandakgipa kamrangko nikani ja·mano namen kusi ong·jaha, indake A·chik a·songna develop-ko ba namroro-silrorogniko ra·baaniko cha·sote galenggipa, kamrangko tikka ra·e ka·gipa contractor-rangko nie dongaijawa, kamrangko namedake tarie on·na nanggen’’ ine NAS mikrakataha.
NAS-ni koboro janapani gitade, ia JJM scheme-ko jako ra·gipa contractor, chi tank-rangko namedake tarijaha, rong mangmangko repidape, PHE-ni gitcham chi tank-rangko taridapgija togie kamko ka·aha, ian kraani ong·ja, aro a·song chigani namroro-silrorogniko nosto ka·enga ine aganan baksa, Ma·mongni on·atgipa scheme-rangko jemangan chu·onga gita tarie on·jaengachim, uamangni kosako high court-o PIL-ko on·gen ineba NAS mikrakataha.
NAS-ni koboro janapani gitade, kam ka·a namgijako aganoba mitam contractor-rangde songni nokni manderangkosa domki on·pila ineba songni manderang matnange aganaha. Unomitingo kamtangko niroke ka·china gita PHE department-koba NAS didianiko on·angjolaha.
