Jal Jeevan Mission-ni bidingo awareness program-ko ong·atenga

TURA: Jal Jeevan Mission (JJM)-ni bidingo dingtang dingtang dolrangna agan-talate on·na gita salbrina ong·atenggipa awareness-cum sensitization program-ko Mongolbar salo, Tura-ni SMELC building-o a·bachengate on·angaha.
Ia awareness program-ko Salt Lake Institute of Engineering & Management (SLIEM) baksana PHE department nangrime ong·atenga aro ia program-ko Village Water & Sanitation Committee (VWSC) aro songni nokni gipin dolrangna ong·atenga.
Ia Jal Jeevan Mission-ara songo noko donggipa nokantionan ringani chirangko sokate on·na miksonganio ma·mong sorkarini ra·gatgipa mission ba kam ong·ani gimin sorkarini sokate on·enggipa chi pipe-rangko songo noko nirokna gita dingtang dingtang dolrangna agan-talate on·aniko dakna ia program-ko ong·atenga.
Ia salbrina ong·atenggipa awareness program-ko dingtang dingtang official-rang aro skie on·gipa manderang, JJM-ni kamrangni bidingo songni nokni dilgiparangna aro dingtang dingtang dolrangna agan-talate on·anggen.
Ia awareness program-ko a·bachengate on·angani somoio West Garo Hills a·jani Deputy Commissioner Ram Singh, program-o bak ra·enggiparangna aganprakangengon, songni nokni dilgiparangna aro dingtang dingtang dolrangna, JJM-ni kamrangni bidingo agan-talate on·na gita iandakgipa program-ko ong·ataniara pilaknan namgipa chol ong·enga ine parakangaha. Chiring chibisikrango bol wa·arangko nisie galengani a·sel chirang tiproroangengahani gimin an·tangni jajrengchakenganiko parakatengon, manderang ringani chirangna diljana gita chiring chibisikrango bolrangko ge·daprorona nanga ine Deputy Commissioner ku·pattianiko on·angaha.
Chiringrangko ripinge rakkiani bidingo manderangna mikrakatanirangko on·china gita ua JJM-ni official-rangkoba didiangaha.