TURA: Basic Grant aro Tied Grant-ni ning·o ma·mong sorkarini chamatgipa tangka paisarangko Garo Hills Autonomous District Council (GHADC)-o kam ka·enggipa manderangni dormaharangko on·na jakkalskaaha ine matnanganirangko dakani ja·man ma·mong sorkarini chame on·atgipa tangka paisarangko jakkalsretani dongja ine GHADC-ni Executive Committee (EC) talataniko on·angskaaha.
“Dingtang dingtang project-rangna ma·mong sorkarini chamatgipa tangka paisarangko GHADC-ni Executive Committee, maming dakeba jakkalsreta dongja ine chinga talataniko on·na ska,” ine Mongolbar salo, GHADC-ni Secretary seachi parakataha.
Indake ong·engon, district council-rangara an·tangari chalaigipa bimangrangsa ong·ani gimin district council-rangni tangka jakkalani bidingo a·dok sorkaride mamingkoba aganpana man·jawa ine Meghalaya a·dokni Chief Minister aro National People’s Party (NPP)-ni national president Conrad Sangma parakatskaaha.
Da·o dipet GHADC-ni EC-ko NPP-chi dilanichi chalaiengachim ine nikna man·a.
Chief Minister-ni parakatani gitade, a·dokni autonomous district council-rangna chamatgipa tangka paisarangko district council-rang an·tangtangsa jakkalna gita bil donga aro iano sorkaride maming bak dongpajachim.
“District council-rangni tangka jakkalani bidingo anga an·tangde mamingkoba aganna man·jawa indiba ia tangkarangara Jal Jeevan Mission-ni ning·o songni nokni manderangna rongtal an·tale dongani aro chirangko sokate on·na ma·mong sorkarini chamatgipa Tied Fund-sa ong·genchimode, uan uamangna ja·mano tangka paisarangko man·anio neng·nikani ong·naba gnang,” ine Sangma talataniko on·angaha.
GHADC-o kam ka·enggipa manderang indita jarangni dormaharangko man·na nangkuengani giminsa GHADC-ni dilgiparang, kam ka·giparangni dormaharangko on·chengna nangnikahakon ineba Chief Minister aganaha.
“District council-rangna chamatgipa tangka paisarangko uamang dormaha on·na ba namroro silroroani kamrangna jakkala uade uamangni skaniosa ong·aia indiba ma·mong sorkarini chamatgipa tangka paisarangna utilisation certificate-rangko on·na man·jagenchimosa gnigipa instalment-rangko man·anio adita neng·nikanirangko chagrongnaba gnang,” ine Sangma aganaha.
Basic Grant aro Tied Fund-rangko a·dok gimikni ADC-rangnan chamatahani gimin ia tangka paisarangko jakkalsretbebegenchimode ja·mano GHADC-san ong·aigija KHADC aro JHADC-ba apsan daken gnigipa instalment-ko man·anio neng·nikanirangko man·gnok ineba Chief Minister parakataha.
