TURA: Tura municipality-ni ning·o wak matchu jilaniko champengna gita niamko ra·gataha ine Tura Municipal Board (TMB)-ni Chief Executive Officer u·iataha.
CEO-ni u·iatani gitade, Tura Municipality-ni ning·o donggipa dingtang dingtang gittimrango wak matchurangko watbrange jilengani a·sel neng·nikanirangko man·tokenga ine badi ka·aniko ma·soahani gimin da·o municipality-ni ning·o wak matchu jilgipa manderangni kosako TMB-ni gita ja·kurangko de·na tik ka·angaha.
Tura municipality-ni ning·o niam gri wak matchu jilenggipa manderangko TMB-ni enforcement dol sandienba, Meghalaya Municipality Act 1973-ni niamrango pangchake nanga gita ja·kurangko de·anggen ineba TMB-ni CEO parakataha.
Niam gri wak matchu jilgiparangko rim·a man·genchimode, iandakgipa manderangoniko dairangko ra·an baksana wak matchurangkoba rim·e ja·mano jinmana dakkie palgen ineba CEO parakataha.
