SHILLONG: Meghalaya a·doko Jal Jeevan Mission (JJM)-ko chu·sokatna gita tangka paisa chamaniko ma·mong sorkari dontongataha ine kobor on·aniko Meghalaya a·dokni PHE Minister Renikton L Tongkhar aro a·dokni Chief Minister Conrad Sangma-ba jegalataha.
Iani bidingo talataniko on·angengon, a·doko JJM-ni kamrangko name chu·sokatengani gimin ma·mong sorkari, Meghalaya a·dokna tangka paisarangkosa chamdape on·aha aro a·doko JJM-ni kamrangko ma·mong sorkari dontongatgenchim ong·ode mikrakatanirangko ba show cause notice-rangkosa man·sochenggenchim ine PHE Minister parakataha.
“Da·o dipet chinga JJM-ni bidingo ma·mong sorkarioniko iandakgipa chittirangko man·soa dongkujani gimin ia koborara kakket ong·ja. Meghalaya a·doko JJM-ni kamrangko dontongatgenchim ong·ode JJM-ko nirokenggipa Jal Shakti Ministry-an a·dok sorkarina seatchenggenchim ba talataniko on·chinasa ge·etgenchim. Indiba chinga chingni kamrangna tangka paisarangkosa man·dapaha,” ine Tongkhar aganaha.
Iandakgipa koborrangko bebera·jachina aro pangnan kakketkosa sandichengchina gitaba ua a·dokni manderangko didiataha.
“Manderangde media-on ka·dongengani gimin pangnan kakketkosa manderangna kobor on·na nanga. Koborrangko songbadrango gatahaode ian kakket ong·a inesa manderangde chanchiaiaha,” ineba PHE Minister aganaha.
PHE Minister-ni parakatani gitade, gipin a·dokrang baksa tosusagenchimode Meghalaya a·dokon JJM-ni kamrang nambate chu·sokna man·enga.
A·bachengode Meghalaya a·doko chi pipe soke man·gipa nokdangrang ge 4,550-san dongaiachim ine janapatengon, da·o JJM-ko ra·gatani ja·man a·doko chi pipe man·gipa nokdangrang 1,98,000-mangni gita ong·engaha ine PHE Minister parakataha.
Ia 2022 bilsini gisepon Meghalaya a·doko pilak nokdangrangnan chi pipe-rangko sale on·na gita sorkari nisan ka·engani gimin ia nisanko chu·sokgipa ong·atna pilakkon rake kam ka·china gitaba Tongkhar didiataha.
PHE Minister-ni parakatani gitade, ia JJM-ni ning·o a·dokni dam 1200 songrangna baten chi pipe-rangko sale on·na man·engaha.
Meghalaya a·doko JJM-ni kamrangko ma·mong sorkari dontongataha ine agananiko a·dokni Chief Minister Conrad Sangma-ba jegalataha aro da·o dipet a·doko JJM-ni kamrangko dontongatna gita ma·mong sorkarioni maming u·iatanirang dongkuja ine parakataha.
“Kakketko agangenchimode da·osa kamrang ta·rakbatengaha aro bilsisa atani gisepon chinga lak 2-na baten nokdangrangna chi pipe-rangko sale on·na man·aha. Sorkarini nisanko chu·sokgipa ong·atna kam ka·enggipa manderang somoina batpile kamrangko ka·tokenga,” ine Sangma, kobor ra·timgiparangna aganaha.
Kam ka·gipa manderangni rakbee kamrangko ka·engmitingo iandakgipa koborrangko on·aniara namen kragijani ong·aha ineba Chief Minister parakataha.