TURA: North Garo Hills a·jani Kharkutta aro Resubelpara block-rango January 11 tarikoni 18 tarikona COVID-19-ni Special Vaccination Campaign-ko ong·atengani gimin ia campaign-ko tika su·rikgipa manderangnade Lottery tikit ba rasong kolani lekkarangko indin suale on·enga ine kobor on·aha.
Manderangko tika su·na didina gita ia ja·ku de·aniko North Garo Hills a·jani District Administration, dingtang dingtang dolrang baksa nangrime a·bachengataha.
Special Vaccination Campaign-ko Kharkutta block-o January-ni 11 aro 12 tarikrango aro Resubelpara Block-oba January-ni 17 aro 18 tarikrango ong·atskaengachim.
Ia lottery ba rasong kolaniko re·baenggipa January 21 tariko Meghalaya Day-ko manianio kal·anggen aro rasong donggipa manderangde smartphone aro Bluetooth Earpiece-rangko man·anggen.
Ia lottery-na boksisrangko Resubelpara-ni Gabil Entreprise dakchake on·enga ineba kobor on·aha.