SHILLONG: Meghalaya a·doko 1972 bilsini January 12 tariko ra·gatgipa reservation policy-kon da·oba ja·rikengkua ine North Shillong-ni KHNAM MLA Adelbert Nongrum parakatenba, ia state reservation policy-ko nipiltaichina aro dingtang dingtang poraiani gadangrang baksana admission-rangnaba dingtang reservation policy-ko tarichina gita a·dokni Chief Minister Conrad Sangma-ko didiataha.
Iani bidingo a·dokni Chief Minister-na memorandum-ko on·angengon, 1972 bilsio ra·gatgipa reservation policy-ko da·o ja·rikaniara kraani ong·jaha ine Nongrum, a·dokni reservation policy-ko nipiltaichina gita Chief Minister-ko didiataha.
“Meghalaya a·doko mande jelbra jelsuaniko nigenchimode bilsi 50-na skang ra·gatgipa reservation policy-ko da·ona ja·rikengkuaniara kraani ong·jaenga. Indita bilsirangni gisepo a·doko Mandeni jelbra jelsuani batroroangaha aro namen dingtangaha. Gitcham reservation policy-koara gipin jatrangni jelbra jelsuaniko niesa aro ku·sikrango pangchakesa tariaha indiba ian Constitution-ni Article 16 (4)-o on·gimin niam gitade ong·jaengaha,” ine KHNAM MLA parakataha.
Somoirang dingtangangani kri, sorkariko chalaianio nambatatna gita adita dingtangatanirangko nangengaha ineba Nongrum parakataha.
Poraiani gadang aro admission-rangna dingtang reservation policy-ko ra·gatchina didiangengon, Mandeni jelbra jelsuani kri aro pilakni gitan apsan gadangko on·na man·na gita niamko ra·gatchina KHNAM MLA dabiangaha.
Kamrangna reservation policy-ko Khasi-Jaintia-rangna 40 percent aro Garorangna 40 percent-kon ja·rikangkuchina didiangengon, poraiani gadang aro admission-rangnade dingtang niamko ra·gatskachina gita Nongrum didiangaha.
