SHILLONG: Meghalaya Legislative Assembly-o sak 60 MLA-rangni a·dokna Inner Line Permit (ILP)-ko on·china didie resolution ra·aoni da·o bilsigni batangpilengahaoba ma·mong sorkarini gita maming aganchakanirangko on·kujaengani gimin Meghalaya a·dokni bilsi 50 gapani boksis gita ILP-ko on·skachina a·dokni Congress dol, BJP-chi dilenggipa ma·mong sorkariko didiangaha.
Congress MLA PT Sawkmie-ni kobor ra·timgiparangna parakatani gitade, Meghalaya a·dokni bilsi 50 gapaniko manina siengani gimin ILP-ko a·dokna boksis dake on·skagen ine uamang ma·mong sorkario ka·dongenga.
A·doko ILP-ko ra·gatchina dabianiko ma·mong sorkari knachakna gisik nangjaengani gimin uamang, a·dokni Chief Minister-ko a·dokni sak 60 MLA-rang baksa Delhi-ona re·ange a·songni Prime Minister aro Union Home Minister baksa ILP-ni bidingo agangrikchina nangnikenga ineba Sawkmie parakataha.
2019 bilsion a·dokni Chief Minister Conrad Sangma-ko re·angpile Krismasko manian baksana Assembly-o ILP-na resolution pass ka·china gita Union Home Minister aganatahachim ine janapatengon, da·o a·dokni dilgiparangko Delhi-ona rimange ILP-na dabiani kamara Chief Minister-ni jakon ong·enga ine Congress MLA parakataha.
Assembly-o resolution ra·aniko ma·mong sorkari mande ra·na nangachim ine janapatengon, ILP-ni bidingo Congress dol mamingkoba dakjaha ine changni chang Chief Minister Conrad Sangma matnangaha aro da·ode ua an·tangan ma·mong sorkari baksa agangrikenba a·dokna ILP-ko man·e on·skana nanga ine Sawkmie parakataha.
“Ua a·dokni dilgiparangko Delhi-ona rimange ma·mong sorkari baksa agangrikgenchimode uni ia kamo gisik nanganiko mesokani ong·gen,” ine ua aganaha.
Assembly-o resolution-ko ra·ani ja·manoba aro dingtang dingtang dolrang dabianirangko dakengoba a·doko ILP-ko ra·gatani bidingo ma·mong sorkari da·onan maming talatanirangko on·kujaengachim ine nikna man·a.
