TURA: Re·anggipa bilsini April 30 tariko District Selection Committee (DSC)-ni advertise ka·gipa dingtang dingtang kamrangna manderangko seokanio, DSC-ni membor-rang niamrangko pe·e, mikkang nitea gnangsa kamrangko on·aha ine Bristibar salo South Garo Hills a·jani Constitutional Rights Forum (CRF) aro gipin dolrang matnangataha.
Iani bidingo Meghalaya a·dokni Chief Secretary-na badi ka·e sedoatengon, re·anggipa bilsio DSC-ni gita LDA, Clerk, Gram Sevak, Soil & Water Conservation demonstrator, sectional assistant, vaccinator, grade IV, game watcher aro driver-ni kamrangna advertise ka·enba, re·anggipa bilsini November 20 tariko ia kamrangna written examination ba porikkako ong·atahachim indiba kamna manderangko seokanio DSC-ni membor-rang, paraka gri dakenba, an·tangtangni aro politician-rangni manderangkosa kamna seokaha ine CRF matnangataha.
Ia kamrangko on·ani bidingo tale ma·sie ra·na gita uamang RTI ka·ahachim indiba DSC-ni PIO, aganchakaniko on·na jechakaha ineba CRF matnangataha.
“Porikkako seanio pass ka·gipa aro pass ka·gijagipa candidate-rangni gimin ma·sie ra·na gita chinga porikkani mark sheet-rangni giminba sing·doahachim indiba chingni RTI ka·anina uamang aganchakaniko on·na jechakaha,” ine CRF-ni president Ricky D Shira parakataha.
South Garo Hills DSC-ni ning·o iandake niamrangko pe·a kamrangko on·ani ian skanggipa chang ong·ja ine talataniko on·angengon, iani bidingo ta·raken am·sandianirangko dakchina gita CRF, a·dokni Chief Secretary-ko didiataha.