BJP-ni gisepo meligrikgijanirang M’laya a·doko batroroenga

 

SHILLONG: Meghalaya a·doko BJP-ko dilenggiparang aro membor-rangni gisepo meligrikgijanirang batroroangengon, state president-ni kosako chakatgipa BJP-ni member-rangko BJP-ni state president Ernest Mawrie, obostarangko namatani pal, Trinamool Congress aro Congress dolo napchinasa aganskaaha ine Ri Bhoi a·jao BJP-ni gitcham membor-rang parakataha.

Ri Bhoi a·jani gitcham BJP president S Thabah-ni parakatani gitade, BJP-ni state president Ernest Mawrie-ni kamrango kusi ong·jaesa BJP-ni bang·bata member-rangan doltangko wate kattokenga aro da·o uko state president ong·aoniko ra·galchina gitaba dabitokengachim.

“Ua (Mawrie) an·tangni man·gnini giminsan chanchie, a·doko tangka jakksretani bidingoba ku·rangko on·aha aro iasan ong·aigija uni kamrang namjani giminsa BJP-ni bang·bata member-ranga uko state president-oniko ra·galchina dabitokenga,” ine Thabah parakataha.

Tangka paisarangko jakkalsretani bidingo BJP-ni state president, NPP dol baksade songgigrikaniko dakmanaha aro ian BJP-na kakket ong·e kam ka·enggiparangna aro 2023 bilsini election-o BJP-ni tikitchi susana ka·dongsoenggipa manderangnade kenchakna nangani ong·enga ineba Thabah, BJP state president-ni kosako chakatenggipa pilak membor-rangkon ku·cholsan ong·e da·on ja·kuko de·china gita didiataha.

2018 bilsini Assembly election-o BJP-ni treasurer Sarvan Jhunjhunwala-ni a·selsa amako man·tokaha ineba a·doko BJP-ni kosako chakatenggipa member-rang parakataha.

Meghalaya a·dok gimiko sak 100-na baten dingtang dingtang kamrangko ka·enggipa BJP-ni dilgiparang kamtangtangko wattokaha ine janapatengon, kamtangtangko watgiparangoni mitamde general secretary, state vice president, mahila morcha president, district president aro uandakgipa member-rangan ong·achim ine Thabah parakataha.