TURA: Re·anggipa Bristibar salo, Meghalaya a·dokni Home Minister Lahkmen Rymbui, Williamnagar-ona re·baenba, East Garo Hills aro South Garo Hills a·jarango niam reti rakkianiko nipiltaina gita tom·aniko ong·atangaha.
Ia tom·anio, DIG Western Range Anurah Kumar baksana East Garo Hills a·jani Superintendent of Police (SP) Bruno A Sangma, South Garo Hills a·jani SP Rituraj Ravi aro dingtang dingtang police officer-rangba bakko ra·angaha.
Police officer-rang baksa tom·ani ja·mano a·dokni Home Minister, Rongjeng-o rikgipa Model College aro Williamnagar-o rikenggipa Williamnagar Government College-koba niangaha.
Iani ja·mano ua Samanda-o donggipa 5th MLA Battalion-koba niangaha aro uni ja·man joljol West Garo Hills a·jaona re·angskaaha.
Bristibar salo, Home Minister-ni Williamnagar-ona re·baengmiting somoio uko re·dilenggipa police escort-rangoni gari bolsa, bike bolsa baksa chagake a·sel ong·ahachim aro ia a·sel ong·anio bike-ko salgipa mande siangna gita nangahachim ine nikna man·a.
