TURA: South Garo Hills a·jao niam gri koelarangko bikote aro gipin biaprangona salangenga ine South Garo Hills a·jani Constitutional Rights Forum (CRF) matnangatenba, a·jaoniko koela salrurana on·aniko ta·raken dontongatpilchina gita a·dokni Chief Secretary-na sedoataha.
Adita salrangna skangsan iani bidingo A·chik Holistic Awakening Movement (AHAM)-ba apsan daken a·dokni Chief Secretary-na badi ka·doatahachim ine nikna man·a.
Iani bidingo CRF dolni gita Chief Secretary-na sedoatengon, South Garo Hills a·jaoniko Assam a·dokni company-rangna niam gri koela salna on·enga ine Transport department aro Mining & Geology-ni commissioner baksana South Garo Hills a·jani deputy commissioner-ni kosako badi ka·doangaha.
CRF-ni president Francis R Marak-ni parakatani gitade, gipin biaprangoniko salbaenggipa koelarangko Gasuapara-o donggipa Customs Station gita Bangladesh a·songona salangna gita Guwahati-oni Jaimaa Coal Pvt Ltd Company-na on·aha aro ia apsan dakgipa order-kon South Garo Hills a·jani Deputy Commissioner-ba Dudhnoi-o donggipa Maruti Fuels company-na on·ahachim. Indake ong·genchimoba Bangladesh a·songona salangenggipa koelarangara, gipin biaprangoniko ra·baenggipa koelarang ong·ja indiba South Garo Hills a·jaoniko cho·e salangenggipa koelarang ong·a ine CRF matnangatskaaha.
“Ia company-rang koelarangko Assam-oniko ra·baenga ong·ja indiba South Garo Hills a·jao bikotenggiparangkon salangenga. Ia koelarangara niam gri bikotenggiparangsa ong·a aro ia koelarangko Rongding Awe, Dangsa Awe, Rongsa Awe, Garegittim aro Are Gittim-rangonikon salangenga,” ine CRF-ni president parakataha.
Ia songrango bikote dongimin koelarangko salna gita dakkie man·gipa Babul Marak-na DMR, challan-ko on·skaaha aro da·o uamang salantian ia jolrango donggipa koelarangko salangenga ineba CRF parakataha.
Salantian South Garo Hills a·jani rama jal·langrang gita koelarangko salengani a·sel rama jal·langrang nosto ka·ako man·engaha aro ia rama jal·langrangko ta·raken taripile on·na nangengaha ine CRF-ni secretary Greneth Sangma parakatskaaha.