TURA: SSA skulrango skigiparangna re·anggipa October jaoni December jaona jagittamni dormaharangko on·kujaengani gimin okumu chake jingjengattaina gita All Garo Hills SSA School Teachers Association (AGHSSASTA) ka·mikkenataniko on·angaha.
SSA skulrango skigiparang, an·tangtangni man·na nangkuenggipa dormaharangko man·tokkujaengani gimin re·anggipa December-ni 24 aro 25 tarikrango Krismasko maniani somoirangoba skigiparang, Meghalaya a·dokni Chief Minister Conrad K Sangma aro Tura-ni MP Agatha K Sangma-ni nok mikkango okumu chake jingjengatna tik ka·ahachim indiba ua somoio skigiparangna sorkari dormaharangko on·na ku·rachakahani gimin okumu chake jingjengataniko dontongatpilahachim.
Indake ong·engon, da·o gital bilsiko ga·tapani ja·manoba SSA skulrango skigiparangna jagittamni dormaharangko on·kujaengani a·sel skigiparang neng·nikanirangko chagrongna nangtokengahani gimin skigiparang, an·tangtangni man·gni dormaharangko ta·raken on·china sorkario dabiangtaiaha.
“Re·anggipa 2021 bilsini bon·na skangan ma·mong sorkarioniko tangka paisarangko man·soahaon chingni dormaharangko chu·gimik on·gnok ine a·dok sorkari chingna ku·rachakahachim indiba da·o January ja tong·sa ong·angpilengahaoba chinga da·onan jagittamni dormaharangko man·tokkujaenga,” ine AGHSSASTA-ni president LG Momin parakatenba, ia salsa salgnini gisepon skigiparangna chu·gimik dormaharangko on·jagenchimode okumu chake jingjengatna draatako man·taigen ine parakataha.
Comments are closed.