TURA: India a·songni jakgitel ong·chengaoni salgro salaram a·dokrango namroro silrorobaani bidingo National Seminar-ko Tura Christian College-ni gita, State Bank of India (SBI) Tura regional office baksa nangrime salgnina Tura Christian Girls Higher Secondary School-o ong·atangaha.
Ia National Seminar-ko Meghalaya a·dokni bilsi 50 gapaniko maniani bak gita ong·atangaha aro ia program-ko ong·atanio Tura-ni MP Agatha K Sangma, mongsonggipa sokgipa ong·e bakko ra·angaha aro Selsella-ni MLA Ferlin CA Sangma, guest of honour ong·e bakko ra·angskaaha.
Ia National Seminar-ko ong·atani bidingo NEHU Shillong-ni ning·o donggipa History Department-ni Professor aro North East India History Association (NEIHA)-ni general secretary Prof Amena Nora Passah, jinmana talataniko on·angaha aro uni ja·man ‘Political Development in Meghalaya since 1970’ katta bichongo pangchake, a·dokni gitcham deputy chief minister aro Meghalaya State Law Commission-ni co-chairman Bindo Mathew Lanong aganangskaaha.
Ia seminar-ni dingtang dingtang technical session-rangko ong·atanio NEHU Shillong, History Dept-ni Prof AK Thakur, Prof Amena Norah Passah aro NEHU Tura, Education Department-ni Prof Nikme Ch Momin, gimik ming 26 paper-rangko poraiataha.
Ia Session-ni gnigipa sal ba session-ko matchotatani somoio SBI Tura regional office-ni Chief Manager Sanjay Safi, mongsonggipa sokgipa ong·e bakko ra·angskaaha aro ia session-ko matchotatanio dingtang dingtang paper-rangko chimonge chapa ka·na gita tik ka·e donangjolaha.
