SHILLONG: Meghalaya a·doko COVID-19-ni Omicron rokomko man·giparang batrorobaenga ine health official-rang kobor on·aha.
“Da·o dipet dolgittam sample-rangko genome sequencing-na porikka ra·aha. January 3 tariko chinga sak 70-ni sample-rangko porikka ra·e niaha aro unoni sak bongade Omicron rokomko man·aha ine chinga nikaha aro January 7 tarikoba chinga sak 45 manderangni sample-rangko porikka ra·e unon sak 27-de Omicron-ko man·giparang ine chinga ma·sina man·aha. January 14 tarikoba chinga sak 47 manderangni sample-rangko porikka ra·e nitaiaha aro unoni sak 45-de Omicron aro sak 2-de Delta rokom ong·achim,” ine Health official-rang parakataha.
Genome sequencing-ko dakaniara namen koros ong·gipa aro somoi nanggipa ong·ani gimin da·o dipet gimikkode porikka ra·e nina man·kujaenga indiba genome sequencing-na sample-rangko on·atengon, a·dokni dingtang dingtang biaprangkoba man·gopatna jotton ka·enga ineba health official-rang aganaha.
Ia Omicron rokomara namen batninggipa ong·a ine talataniko on·angengon, manderangko tika su·e ra·china aro booster dose ra·na man·enggipa manderangkoba ta·raken ra·china gita health official-rang didiataha.
Meghalaya a·doko bang·a manderangan tika su·e ra·tokkujaenga aro sorkari, ma·manti saanirang donggipa budepa butchumarangko tika su·na jotton ka·engachim ine adita salrangna skangan, Health department-ni Principal Secretary Sampath Kumar-ba parakatahachim.
Manderangko porikka ra·e nina gitaba sorkari jotton ka·enga ineba ua sabisini chin donggipa manderangkode re·bae an·tangtangko porikka ra·china gita didiataha.