SHILLONG: Meghalaya a·doko sorkarini dingtang dingtang kamrangna upper age limit ba bilsi donaniko bilsi 32-oniko bilsi 37-ona ra·dodapatani bidingo a·dokni Cabinet Sombar salo chanchiangaha.
Da·o dipet Meghalaya a·doko sorkarini kamrangna upper age limit-ko bilsi 32-onasan donengkuani a·sel bang·bata chadamberangan kamrangko ka·e cha·na chol ong·tokjaengani gimin upper age limit ba batbewal bilsiko bilsi 5-chi bariatna sorkari manchienga.
Iani bidingo Cabinet tom·a matchotani ja·man kobor ra·timgiparang baksa agangrikengon, sorkarini kamrangna upper age limit-ko bariatna proposal on·aniko taridapna nangkuengani gimin da·o Cabinet-ni changgipin tom·anio sorkari chanchiangtaie ja·kuko de·na tik ka·aha ine a·dokni Home Minister Lahkmen Rymbui parakataha.
“Iani bidingo Cabinet, da·o changgipin tom·anio chanchiangtaigen,” ine Rymbui aganaha.
Mitam a·dokrangode kamni upper age limit-ko bilsi 38 aro bilsi 40-ona kingking donahani gimin Meghalaya a·dokoba kamna dongimin bilsiko uamang bilsi 37-ona ra·doatchina sorkariko didiangkugen ine Robibar salosan UDP-ni president Metbah Lyngdoh parakatahachim.
“Da·o dipet dingtang dingtang sorkarini kamrangna dorgastorangko galengon, dongimin bilsiara bilsi 32-na batkujaengani gimin chadamberangna cholrang dongja gita ong·enga. Uni gimin chinga iani bidingo sorkari baksa agangrikangkugen,” ine Lyngdoh aganahachim.
Lyngdoh-ni aganani gitade, COVID-19 sajimani a·sel chadamberang bilsignikode indin gimaatna nangahani gimin sorkari, chadamberangna cholrangko on·na gita chanchipiltaina nangenga.
