SHILLONG: Adita salrangna skang, Tura-o Cricket kal·susaaniko ong·atanio COVID-19-ni niamrangko pe·a ine matnanganiko Sombar salo, a·dokni Chief Minister Conrad Sangma jegalataha.
Tura-o Cricket kal·susaaniko ong·atanichi a·dokni Chief Minister, COVID-ni niamrangko pe·aha aro manderangni janggirangko kenchakna nangani ong·ataha ine All India Trinamool Congress (AITC), a·dokni Chief Minister-ko matnangatahachim.
AITC-ni matnangatani gitade, Tura-ni Police Parade Ground-o Chief Minister-ni Cricket kal·susaaniko ong·atanio sak 250-na batpile manderang tom·dake kal·susaaniko bang·bata manderangan mask-rangko gangijasa nitokahachim.
An·tangni kosako matnanganiko jegalatskaengon, deputy commissioner-ni permission-ko ra·chengesa dingtang dingtang program-rangko ong·ataha ine Sangma parakatskaaha.
Ia pilak program-rangko ong·atanio COVID-na dongimin niamrangko ja·rikaha ine talataniko on·angengon, badiaba badiaba program-rangosa manderang, niamrangko pe·engnaba gnang indiba uan program-ni a·palosa ong·aigen ine Chief Minister parakataha.
Adita salrangna skang, Rajabala constituency-ni ning·o donggipa Batabari songo program-o bang·bea manderang bakko ra·ahani giminba Chief Minister-ko matnangtokahachim aro ia tom·anio Rajabala-ni gital NPP MLA Abdus Saleh-ba dongpae bakko ra·angahachim. Meghalaya a·doko COVID-19 giprorotaiengahani gimin a·dok sorkari, iandakgipa jinma tom·anirangko champengatani ja·manoba ia tom·aniko ong·atangahachim ine nikna man·a.
Chief Minister-ni social media-o mesokatgipa noksarangoniko nikna man·ani gitade, ia tom·bimonganio bang·bea manderang bakko ra·angahachim.
Robibar saloba a·dokni Chief Minister, Weiloi Catholic Mondolini Diamond jubilee-ko manianio bak ra·eahachim aro uni social media-o mesokatgipa noksarangoniko niksona man·ani gitade, ia program-oba bang·a manderangan mask-rangko gangija bakko ra·angtokahachim.
