TURA: Re·anggipa January-ni 7 tariko, West Garo Hills a·jani Haripur Namabilla Higher Secondary School-na skigiparangko ra·anio niamrangko pe·aha ine School Managing Committee-ni gitcham president matnangatenba, skigiparangko kamo rakkina gita ong·atgipa interview-ko gale gital ong·attaichina Shillong-o donggipa School Education & Literacy-ni Director-na sedoataha.
Iani bidingo Education official-na SMC-ni gitcham president Jamial Hoque-ni badi ka·doangani gitade, ia skulni skigipa sakgniko rakkina gita advertisement ba u·iataniko skulni principal an·tangsa dakahani gimin ian niamko pe·e skigiparangko rakkiani gita ong·aha ine matnangataha.
Hoque-ni parakatani gitade, uni SMC-ni president ong·engmiting somoion ia kamrangna advertisement-ko on·na gita SMC membor-rang resolution-ko DSEO-na on·ahachim indiba da·alonan ia resolution-ko DSEO ra·chakkujaengachim.
“Niam gri kamrangko on·na gitasa ia resolution-ko donchipenga ine anga bebera·a maina iandake niam gri kam on·ani dongjagenchimode skatang kamni bidingo advertisement-ko on·jawachim,” ine SMC-ni gitcham president matnangataha.
Ia skulni gital SMC-ko songna gita adita salrangna skangsan DSEO, SMC membor-rang baksa tom·aniko ong·atna tik ka·ahachim ine janapatengon, gital SMC-ko songna skangan maini gimin skulni principal, advertisement-ko on·na nangaha ine Hoque sing·doangaha.
Skangode ia skulna nangenggipa skigiparangara Science-na saksa aro Arts-na saksasa ong·achim ine janapatengon, kamna advertisement on·aniode skigipa sakgnian Science-ni skigiparangnasa ong·skaaha ine Hoque parakataha.
Indake ong·engon, ia skigiparangni kamna ong·atgipa interview-ko den·galpile, gital SMC-ko songani ja·manosa kamna advertisement-ko on·china gita SMC-ni gitcham president, Education official-ko didiataha.