SHILLONG: Meghalaya a·dokni bilsi 50 gapaniko maniengon, a·dokko man·na krengdilanggipa manderangko mande ra·pilskaani chin gita award-rangko on·an baksana pension-rangko on·china gitaba Hill State People’s Democratic Party (HSPDP), a·dok sorkariko didiangaha.
Iani bidingo a·dokni Chief Minister Conrad Sangma-na sedoatengon, a·dokko man·e on·na krengdilanggipa manderang, an·tangtangni gamchatbegipa somoi, gam-jin aro bilrangko on·kangpile kamrangko ka·ahani gimin a·dokni bilsi 50 gapaniko maniani salo, ia dilgiparangna mande ra·pilskaani chin gita upatti aro pension-rangko on·skana nanga ine HSPDP-ni president KP Pangniang parakataha.
“Meghalaya a·dokni bilsi 50 gapaniko manianio MDA sorkari, Meghalaya a·dokko man·na gita an·tangtangko on·kange kam ka·gipa manderangna mande ra·pilskana gita dingtang dingtang ja·kurangko de·chakataha ine chinga nikna man·enga. Uni gimin ia salko maniengon, a·dokko man·na gita krengdilanggipa manderangna award-rangko aro pension-rangko on·china gitaba chinga sorkariko mol·molenga,” ine Pangniang parakataha.
HSPDP president-ni parakatani gitade, re·anggipa 2021 bilsini November 10 tariko, HSPDP-ni bilsi 53 gapaniko maniani somoioba uamang, Meghalaya a·dokko man·na krengdilanggipa manderangna dingtangmancha mande ra·pilskaaniko dakangahachim.
Meghalaya a·dokko man·na gita krengdilanggiparangoni saksa aro HSPDP-ni gitcham president Hopingstone Lyngdoh sagina dingtangmancha ia salo mande ra·pilskaaniko dakchina gitaba HSPDP, a·dok sorkariko didiangaha.
“Chingni gitcham dilgipako mande ra·pilskaani chin gita West Khasi Hills ba South West Khasi Hills a·jao sorkari college ba university-ko Hopingstone Lyngdoh-ni bimingchi mingskachina chinga ku·pattianiko on·enga,” ine Pangniang parakataha.
