TURA: Mongolbar attamo, South West Garo Hills a·jani Katabari minggipa songo, ML-08F 3215 pik-up gari bolsa aro AS-17D 4148 motorbike bolsa baksa chatinggrike a·sel ong·aha aro ia a·sel ong·anio motorcycle-ko salenggipa chadambe saksa siangna gita nangaha.
Koborko on·ani gitade, ia a·sel Mongolbar attamni 5:00 bajimango ong·aha aro a·sel ong·ani ja·mano pik-up garini driver, ua biaponi kataha.
Police-rangni kobor on·ani gitade, motorcyle-o bilsi 18 ong·gipa Romio Koch aro bilsi 24 ong·gipa Polison Koch gadoe re·angengachim indiba Katalbari songo uamang pik-up gari bolsa baksa chatinggrike a·sel ong·aha.
A·sel ong·anio bike-ko salenggipa Romio Koch-de biapon sikamaha indiba ki·sango gadoenggipa Polison Koch-de saknaanirangko man·skaahani gimin uko ja·mano sanna gita Garobadha PHC-ona ra·angaha ine kobor on·aha.
Iani bidingo police-rang, mokordomako segatenba, am·sandianirangko dakna a·bachengataha ine u·iataha.
