TURA: Ia bilsio Meghalaya a·dokko man·aoni bilsi 50 gapengahaoba da·o COVID-19 man·giparang batrorobataiengahani gimin January-ni 21 tariko Meghalaya Day-ko Tura-o chone manina gita nangengaha ine West Garo Hills a·jani Deputy Commissioner Ram Singh u·iataha.
Ia chang Meghalaya a·dok bilsi 50 gapengahani gimin ia salko dal·e manina gita program-rangko tarisoahachim indiba bilsi a·bachengaonin a·doko COVID-19-ni gital Omicron rokomko man·giparang dongahani gimin aro da·o COVID-19-ko man·giparang batrorobataiengahani gimin ia salko dal·e manigija, COVID-19-na dongimin niamrang, jekai mask-rangko ganani, saksa sakgipinoni chel·tanggrike dongani, jakrangko rongtale rakkiani aro uandakgipa niamrangko ja·rike, seokgimin manderang baksasa chone maniskana tik ka·aha ine DC u·iataha.
Ia Meghalaya Day-ko Tura-ni DC Park-o pring 10:00 bajioni manianggen.
Indake ong·engon, Meghalaya a·dokni bilsi 50 gapaniko a·dokni skotong Shillong songjinmao maniengani gimin a·dokni Chief Minister Conrad K Sangma-ni nangnikani gita gipin a·jarangba internet gita ia manianio bakko ra·anggen aro apsan daken Tura-oba ia program-ko pring 11:00 bajioni Tura-ni DRDA conference hall-o live mesokanggen ine Deputy Commissioner u·iataha.
Comments are closed.