TURA: Re·anggipa January 7 tarikoni gimaenggipa me·chikmako NGO-rangni dakchakanichi Sonibar salo man·pilaha ine kobor on·aha.
Silky A Sangma minggipa me·chikma saksa re·anggipa January 7 tarikonin, South Garo Hills a·jani Siju songo donggipa nokoni gimaengachim aro uni gimaani bidingo uni segipa, January 10 tariko police-rangna u·iatahachim.
Indake ong·engon, ia me·chikmani bidingo uni nokdangni manderangba, Dainadubi Circle Youth Organisation (DCYO) aro A·chik Indigenous Justice Initiative Forum (AIJIF) dolrangna u·iate, ia dolrangni dakchakaniko bi·ataha aro uandaken ia NGO-rang, ia me·chikmako Sonibar salo uni nokdangona sokatpilna man·aha ine kobor on·aha.
“Ia me·chkni mobile-ko sandina chinga police-rangni dakchakaniko ra·aha aro ua Assam a·dokni Goalpara a·jao donggipa Dudhnoi samba jolon ong·a ine ma·sina man·aha. Ia me·chikko rimbae on·na skang chinga uni nokdangni manderangna u·iatchengaha aro ja·mano ia me·chikko ua biaponiko rimbae on·eaha. Da·o ia me·chik, an·tangni nokdang baksa ong·pilaha,” ine DCYO-ni president Gilsrang D Shira, kobor ra·timgiparangna parakataha.
Ia bilsi 23 ong·gipa me·chik, medical check up ka·na ine nokoni ong·katbaani ja·manosa gimaahachim ine kobor on·aha.
Ia me·chikara, East Garo Hills a·jao donggipa Naringgre songoni ong·achim aro uko NGO-rang, Sonibar attamchibara 3:00 bajimango man·pilaha ineba kobor on·aha.
Ia me·chikko uni segipa aro gipinrang, Dainadubi-ona re·ange rime ra·eskaaha.
