TURA: West Garo Hills a·jani Demdema C&RD Block-ni ning·o donggipa Gandhimari VEC-o tangka paisarangko jakkalsretan baksana ma·manti ong·gija kamrangko ka·ani gimin badi ka·ani ja·manoba maming ja·kurangko de·jaenga ine Gandhimari VEC-ni saksa Abdus Sobur minggipa mande matnangataha.
Abdus Sobur-ni parakatani gitade, VEC-ni kamrangni bidingo RTI ka·e man·gipani gimin ua re·anggipa bilsini November 7 tarikon West Garo Hills a·jani Deputy Commissioner-na badi ka·doangahachim indiba da·onan iani bidingo maming inquiry-rangko daka dongkujaengachim.
Uni RTI ka·anina aganchakani gitade, songo dingtang dingtang kamrangko ka·anio ong·gija dakanirangko nikna man·aha ine Sobur parakataha.
Ia kamna chamgipa gong 11,31,650-oni gong 11,26,620-kode kam ka·giparangna hajira gamna gitasa miksonge chamahachim indiba ia tangkarangko kam ka·giparangna chu·gimik gamjaha ineba badi ka·doanggipa mande a·kangataha.
Songo dingtang dingtang kamrangko ka·aniba namsrangjahachim ineba Sobur badi ka·doangaha.
Ia VEC-o job card donggipa manderangna ma·siatgija gipinrangni bimingrangkoba segataha aro uandaken tangka paisarangko jakkalsretaha ineba Abdus Sobur matnangataha.
Iani bidingo ta·raken inquiry-ko dake tangka jakkalsretgipa manderangni kosako rakgipa ja·kurangko de·china gitaba ua Deputy Commissioner-ko didiataha.