TURA: Salgittamna South Garo Hills a·jani Baghmara Simsang chibima rikamo ong·atanggipa Tyisam Festival-ko re·anggipa Sukrobar attamo ga·subee matchotataha.
Ia Tyisam Festival-ko Meghalaya a·dokni bilsi 50 gapaniko maniani bak gita ong·atangaha aro ia festival-ko Budbar salo a·bachengatahachim.
Ia salgittamna ong·atanggipa Tyisam festival-ko Budbar salo, Rongara-Siju-ni MLA Rakkam A Sangma, do·ga oe on·angaha aro ia festival-ko salgittamna ong·atanio, chio kal·susaanirang, jatni kal·susaanirang, git ring·susaani, chroksusaani, dakmesoksusaani, bijak song·susaani, fancy dress, flower, vegetable & fruit show, baby show aro uandakgipa gipin program-rangkoba ong·atangahachim.
Ia Tyisam festival-o South Garo Hills a·jani Directorate of Information & Public Relations (DIPR)-ni gita photo exhibition-koba ong·atangaha, jeon Meghalaya a·dokko man·na skang aro a·dokko man·ani ja·man ka·gipa noksarangko mesoke golporangkoba tarie mesokjolangaha.
Uandaken ia salgittamna ong·atanggipa Tyisam Festival-ko Sukrobar salo, Meghalaya a·dokni bilsi 50 gapaniko manijole matchotataha.
Bon·kamgipa attamo, ring·anina aro doka dam·anina mingsing minggamako man·gipa dingtang dingtang dolrang, jekai Black Jack, Muz, Da Suraka aro gipin dolrang, ga·subee gitrangko ring·e mesokangaha aro manderangko namen an·saoatangbeaha.
