SHILLONG: COVID-19-ni tikarangko a·dok sorkari, drae su·na jotton ka·enga ine matnangenba, Sonibar salo, ritchani ritcha manderang, sorkarini kamko jegale Shillong songjinmao re·jomangtokaha.
India a·song gimikon Awaken India Movement (AIM) dolni gita tika su·aniko jegaldilengachim aro uandaken Shillong songjinmaoba ia jegalani bak gita jinma re·jomaniko ong·atangaha.
Ia re·jomaniko Motphran-oni a·bachengate, Them Bijoy aro Secretariat Road gita re·angenba, Khyndai Lad-o matchotataha.
Tika su·kugijagipa manderangna cha·ani ringani bosturangko on·jawa, mande siani ba bia ka·ani gita dakgipa jinma tom·bimonganirango bak ra·na on·jawa aro uandakgipa niamrangko ra·gataniara mandena on·gimin bilko pe·ani gita ong·enga ine matnangenba, ia jinma re·jomaniko ong·atanio tika su·aniko jegalenggipa dolrang, manderangna mikrakatanirangko on·angjolaha.
Re·joma matchotani ja·man Khyndai Lad-o dikdiksa tom·anikoba ong·atangaha aro ia tom·bimonganio dingtang dingtang dilgiparang, jinmana aganprakangengon, niamrangko pa·sike manderangko tika su·drajachina gita a·dok sorkariko didiangtokaha.
Manderangko tika su·drana jotton ka·ani, mask-rangko gantelna nangani, porikka ra·atani aro uandakgipa niamrangko ra·gataniara mandena on·gimin bilrangko ra·e katani gita ong·enga ineba uamang, a·dok sorkariko matnangataha.
Re·anggipa bilsionin, iandake niamrangko ra·gatengani gimin, lockdown-rangko ra·gatengani gimin aro tikarangko su·china manderangko draengani gimin a·song gimikon AIM dolni gita, jegalanirangko dakna a·bachengahachim.
Ia jinma re·jomanio darangba mask-rangko ganjaha aro COVID-19-na dongimin niamrangko pe·tokahachim.
