SHILLONG/TURA: India a·songni gipin biaprango gitan a·songni chang 73-gipa Republic Day-ko Budbar salo, Meghalaya a·dokni dingtang dingtang biaprangoba maniangaha aro ia salko manianio a·dokni pilak biaprangon a·songni nisanko badale, a·songni jakgitelanina an·tangtangko on·kange kam ka·anggipa pagitcham ma·gitchamrangna mittelpilanirangko 
dakangaha.
Shillong songjinmao a·songni Republic Day-ko manianio a·dokni Chief Minister Conrad K Sangma, mongsonggipa sokgipa ong·e a·songni nisanko badale on·angaha aro parade ka·gipa dolrangkoba salam ka·angaha.
Ia salko manianio a·dokni Chief Minister, a·dokni manderangna namgipa skaniko parakatengon, a·songko jakgitel ong·atna gita an·tangtangko on·kange kam ka·anggipa pagitcham ma·gitchamrangnaba mittelpilaniko parakangaha.
Bilsi 10-ni gisepon Meghalaya a·dokkoba a·songo nambatsranggipa dam 10 a·dokrangoni damsa ong·atna gita a·dok sorkari, miksonge kam ka·enga ine janapatengon, sorkarini kamrang baksana manderangni bakrimanichi iako sorkari chu·sokgipa ong·atna man·gen ine Chief Minister parakataha.
Jakgitelanina krengdilanggipa Meghalaya a·dokni pagitchamrang, jekai U Tirot Sing, U Kiang Nangbah aro Pa Togan Nengminja Sangma-ko man·chape pilak dilgiparangkon ia salo ua dingtangmancha gisik ra·atpilangenba, manderangko chel·chakna rakbee kamrangko ka·enggipa dingtang dingtang sipai dolrangnaba ua mittelpilaniko parakataha.
A·dok damgnini simarango ru·uta bilsirangonin meligrikna man·jaenggipani bidingo janapatengon, Assam a·dok baksa meligrikna man·jaenggipa dam 12 biaprangoni damdokkode a·dok damgnini nangrime kam ka·anichi da·o namatna gita man·engaha ine Sangma aganaha.
A·doko namroro silroroaniko ra·bana man·engani gimin an·tangni kusi ong·aniko parakatengon, PMGSY, Jal Jeevan Mission aro MGNREGS gita dakgipa scheme-rangko a·doko ta·raken chu·sokatna man·aha ine Chief Minister parakataha.
Ia bilsini gisepon, a·dokni gital Assembly nok, Shillong International Centre for Performing Arts, Ganol Hydro Electric Power Project, Crowborough aro Marriott Hotel-rang, Tura-ni PA Sangma Stadium, Wahajier football stadium, Shillong-ni IT Park, Baghmara aro Nongstoin-ni water supply project-rang, Shillong Govt College of Engineering aro Tura-ni College of Architecture & Urban Planning-ko kulie on·gnok ineba Chief Minister parakataha.
Gipin a·songrangni dakchakanichi a·doko tourism-ko tang·doatna, rama jal·langrangko taridapna, an·seng baljokani aro bijoli kamrangko namdapatna gita sorkari, bang·bea tangka paisarangko chamenga ineba Chief Minister parakataha.
A·doko game ge·e cha·giparangna, me·chikrangna aro chadamberangna sorkari dingtang dingtang janggi tangani cholrangko on·na jotton ka·enga ine janapatengon, a·dok sorkarini ra·gatgipa FOCUS program-chi game ge·e cha·giparang, self help group (SHG)-rang aro chadambe dolrangchi producers group-rangko bikotate tangka paisarangchi dakchakanirangko on·enga ine Chief Minister aganaha.
A·doko chu·sokatna man·gipa kamrango chu·ongnike dongaigija nambata kamrangko chu·sokatangkuna tikkelchina aro a·songna aro a·gilsak gimiknaba dakmesokgiparang ong·china gitaba ua a·doko songdongenggipa manderangko didiangaha.
Chief Minister-ni aganani gitade, 2018 bilsio uni gital sorkariko rikchengani somoirango dingtang dingtang neng·nikanirangko chagrongna nangahaoba da·o bang·bata kamrangkon sorkari chu·sokatna man·aha aro manderangni janggi tanganio dingtanganiko ra·bana man·aha.
Ia salko manianio Chief Minister-ni jakchi dingtang dingtang manderangna award-rangkoba on·angjolaha.
Tura-oba a·songni chang 73-gipa Republic Day-ko New Tura-o donggipa Matchakolgre LP School kal·chakramo maniangaha aro ia salko manianio Tura-ni MP Agatha K Sangma, mongsonggipa sokgipa ong·e a·songni nisanko badale on·angaha.
Tura-o Parade-ko 2nd MLP Battalion, DEF, Women Home Guard Volunteers, Don Bosco College NCC Senior Division, Female Wing aro Junior Wing Contingent baksana Band platoon-rang ka·aha aro parade-ko Commander Pankaj Rasgania dilangaha.
Ia salko manianio dingtang dingtang department-rang tableau-ko dake mesokangaha aro tableau mesoksusaanio skanggipa boksisko Animal Husbandry & Veterinary department, gnigipa boksisko Border Area Development department aro gittamgipa boksisko Soil & Water Conservation department man·angaha.
Ia salko manianio dingtang dingtang kamrangchi manderangna dangdike on·enggiparangna, kal·susaanirango aro lekka poranio teng·suenggiparangna, skigiparangna, bading chiwalanio chu·sokgiparangna aro uandakgipa dingtang dingtang kamrango chu·sokenggipa manderangna Agatha Sangma-ni jakchi award-rangko on·angjolaha.
South West Garo Hills a·jaoba a·songni chang 73-gipa Republic Day-ko mikkim gnangbee maniangaha indiba COVID-19-ko warachakna dongimin niamrang dongani gimin ia salko chonkale maniangskaaha.
South West Garo Hills a·jao ia salko Ampati Students’ Field-o maniangaha aro ia manianio North Tura-ni MLA Thomas A Sangma, mongsonggipa sokgipa ong·e a·songni nisanko badale on·angaha.
Ia salko manianio Ampati District Police-ni parade ka·ani, dingtang dingtang department-rangni tableau mesokani aro cultural program-koba nikangna gita man·aha.
Ia manianio Ampati Women Police Station-ni Officer-in-Charge WPSI Rachna N Marak, cricket kal·anio mingsing minggamako man·gipa Chengkam K Sangma aro gipin kal·susaanirango changgipa sapgipa Rakkamston Ch Marak-na Thomas Sangma-ni jakchi mittelpilani certificate-rangko on·angjolaha.
Ia salko manianio Mellim PHC-na Best Performing PHC-ni award-ko aro Zikzak PHC-na Most Promising PHC-ni award-ko on·angan baksana South West Garo Hills a·jani District Surveillance Officer Dr LCK Sangma-naba, COVID-19 sajinmani somoio rakbee kamrangko ka·e on·ahani gimin mande ra·pilskaaniko dakangjolaha.
Apsan daken, North Garo Hills a·jaoba a·songni chang 73-gipa Republic Day-ko Resubelpara Mini Stadium-o maniangaha aro ia salko manianio Kharkutta-ni MLA Ruper Momin, mongsonggipa sokgipa ong·e bakko ra·angenba, a·songni nisanko badale on·angaha.
Ia salko manianio Police department-ni UBSI Salnang Luke W Momin-na Governor-ni Police Medal-ko on·angaha. Health & Family Welfare department-ni ning·o Best Performing PHC-ni award-ko Wageasi PHC-na aro Best Performing Sub-Centre-ni award-ko Raja Apal Sub-Centre-naba ia salko manianio on·angjolaha.
North Garo Hills a·jaoba ia salko manianio dingtang dingtang department-rangni tableau mesokaniko nikangna man·aha aro tableau-ko mesoksusaanio skanggipa boksisko District Agriculture Office, gnigipa boksisko PHE aro gittamgipa boksisko Horticulture office cheangskaaha.
East Garo Hills a·jaoba a·songni chang 73-gipa Republic Day-ko Rongrenggre kal·chakramo maniangaha aro ia manianio a·dokni Cabinet Minister Sniawbhalang Dhar, mongsonggipa sokgipa ong·e a·songni nisanko badale on·angskaaha.
Ia manianio dingtang dingtang department-rang tableau-rangko dake mesokangaha aro tableau mesoksusaanio Health department chegipa ong·aha.
Ia salko manianio dingtang dingtang kamrango chu·sokgiparangna aro dingtang dingtang kamrangchi manderangna dangdike on·enggiparangna Minister-ni jakchi mittelpilani certificate-rangko on·angjolaha.
Ia salko manianio dingtangmancha cultural program-koba ong·atangaha aro ia program-o name dakahani gimin skanggipa boksisko Ferrando School-na aro gnigipa boksisko Greenyard School-na on·angaha.
A·songni Republic Day-ko maniani bak gita dingtangmancha Williamnagar-ni Veterinary aro Social Welfare department-o kam ka·enggiparang, Williamnagar Civil Hospital-o sae dongenggiparangna, Missionaries of Charity Home-na, Williamnagar jail-o dongenggiparangna aro Children’s Home-o dongenggipa bi·sarangna do·chi aro komilarangko suale on·angjolaha.
Indake ong·engon, South Garo Hills a·jaoba a·songni chang 73-gipa Republic Day-ko Baghmara-ni Simsang rikamo maniangaha aro ia salko manianio a·dokni PHE Minister Renikton L Tongkhar, mongsonggipa sokgipa ong·e a·songni nisanko badale on·angaha.
Ia salko manianio dingtangmancha South Garo Hills a·jani souvenir baksana District Calender 2022-koba Minister-ni jakchi oprake on·angjolaha.
Kal·susaani, sea jotani, sol·a repani, wata chengani, cha·ani tariani aro uandakgipa kamrango chu·sokgipa manderangnaba ia salko manianio dingtangmancha mande ra·pilskaaniko dakangaha.
Ia salko maniani bak gita hospital aro shelter home-rango donggipa manderangna boksis aro cha·anirangkoba suale on·angaha aro una agreba robol kal·susaani, bi·sarangna kal·susaani, cricket kal·susaani aro uandakgipa program-rangkoba ong·atangaha.