SHILLONG: COVID-19-na porikka ra·anio positive ong·ani ja·man, office-tangona re·ange aro a·songni Republic Day-ko manianio bak ra·pae COVID-19-ko warachakna dongimin niamrangko pe·aha ine matnanganiko a·dokni Chief Minister Conrad Sangma jegalataha aro da·o dipet ua COVID-ni niamrangko pe·a dongkujachim ine talataniko on·angaha.
An·tangni kosako iandake matnanganirangna suk ong·gijaniko parakatengon, ua saksa chief minister ong·e dakna nanggni kamrang bang·en gnang indiba kamrangko ka·engon ua saksa simsakgipa mande ong·en niamrangko ja·rikengachim ine Sangma talataniko on·angaha.
Chief Minister-ni parakatani gitade, Meghalaya a·dokni bilsi 50 gapaniko maniani somoioba ua an·tangan be·en an·sengjae aro COVID-19-na porikka ra·anioba positive ong·kujagenchimoba ua jinma baksa bak ra·pana re·angjahachim aro an·tangan niamrangko ja·rikahachim.
“Angni kosako iandake matnanganiara kakket ong·ja maina ango dakna nanggni kamrang bang·en donggenchimoba anga niamrangko ja·rikesa kamrangko ka·enga. Haida angni kosako matnangenggipa manderango gipin dakna nanggni kamrang dongjakon,” ine Sangma, an·tangni suk ong·gijaniko parakataha.
Koborko on·ani gitade, COVID-19-na porikka ra·anio positive ong·ani ja·man ua Mongolbar salo, an·tangni office-ona re·angahachim aro uni ja·man Budbar saloba ua a·songni Republic Day-ko manianio dongpae bakko ra·angahachim.
Chief Minister-ni COVID positive ong·ani ja·man a·dokni Governor Satya Pal Malik-ba porikka ra·anio positive ong·ahachim ine nikna man·a.
Indake ong·engon, Bristibar saloba a·dokni Chief Minister Conrad Sangma-ni atchiani sal ong·e, una a·dokni Governor dingtangmancha Raj Bhavan-o boksisko on·ataha aro uamangni boksis on·grikani noksako social media-o watatani ja·man, bang·a manderangan uamangni kamni gimin sing·dona a·bachengtaitokaha.