SHILLONG: Garo Hills Autonomous District Council (GHADC)-o National People’s Party (NPP)-chi dilenggipa Executive Committee (EC)-ni kosako no-confidence motion-ko ra·na gita January-ni 29 tarik pring 11:00 bajioni special session-ko ong·atchina a·dokni Governor ge·etaniko on·ataha.
GHADC-o Congress dolni MDC-rang pilakan All India Trinamool Congress (AITC)-o napgopangani ja·man AITC dolan mongsonggipa opposition dol ong·skaengahachim ine nikna man·a.
Koborrangko man·soani gitade, GHADC-o NPP dolni ning·oba adita meligrikgijanirang dongengani a·selan da·o AITC dolni gita, NPP-chi dilenggipa EC-ni bilko dake nina siengachim.
GHADC-o chief executive membor (CEM) Benedic R Marak-ni kamo suk ong·niktokjaenggipa NPP-ni membor-rang, uko CEM ong·aoniko ra·gale da·o chairman ong·enggipa Rakesh A Sangma-ko CEM songskachina NPP-ni dilgiparango dabitokenga ineba kobor on·timgiparang parakataha.
Adita salrangna skangsan, NPP-ni MDC sakgni baksana EC-o bakrimenggipa Independent MDC saksakoba GHADC-ni CEM Benedic Marak, chairman ong·aoniko ra·galahachim.
Garo Hills Growers Association-ni chairman Linekar K Sangma, Planning & Advisory Board-ni chairman Sengchim Sangma aro Forest Advisory Committee-ni chairman Aktar Ali-ko GHADC-ni chief executive membor (CEM) Benedic R Marak, dingtangmancha u·iataniko on·enba, uamangni kamoniko ra·galatpilahachim.
Linekar K Sangma aro Sengchim Sangma-de NPP-ni MDC-rang ong·achim indiba Aktar Ali-de Independent membor ong·achim.
