SHILLONG: Budbar saloni Bristibar salona konta 24-ni gisepo Meghalaya a·dok gimiko sakdok manderang COVID-19 man·e siangaha aro uandaken a·doko COVID man·e sigiparang rang·san tang·dona a·bachengtaiaha.
Ia apsan salon a·dok gimiko sak 288 COVID-19 man·daptaiskaaha.
Konta 24-ni gisepo COVID-19 man·dapgipa sak 288 manderangko channe da·o Meghalaya a·dok gimiko COVID-19 man·e dongenggiparang gimik sak 2415 gapengaha aro ia apsan salon mande sakdok COVID-19 man·e siangdaptaiahani gimin a·dok gimiko COVID man·e sianggiparangara gimik sak 1509 gapskaengaha.
Konta 24-ni gisepo COVID man·gipa sak 288 manderangoni, sak 2-de East Garo Hills-o, sak 197-de East Khasi Hills-o, sak 6-de Eastern West Khasi Hills-o, sak 7-de North Garo Hills-o, sak 13-de Ri Bhoi a·jao, sak 7-de South Garo Hills-o, sak 5-de South West Garo Hills-o, sak 5-de South West Khasi Hills-o, sak 38-de West Garo Hills-o, sak 6-de West Jaintia Hills-o aro sak 2-de West Khasi Hills a·jao ong·a.
Salsani gisepo COVID man·e sianggipa mande sakdokoni sak 3-de East Khasi Hills-o, sak 2-de Eastern West Khasi Hills-o aro sak 1-de South West Khasi Hills a·jao ong·a.
Ia apsan salon gimik sak 361 manderang Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 85,917 gapskaengaha.
