SHILLONG: Meghalaya a·dokni chief minister ong·e Conrad Sangma-ni COVID-na dongimin niamrangko pe·aniara namen kratcha·na nangani ong·aha ine a·dokni gitcham Health Minister aro Chief Minister-ni Advisor AL Hek parakatenba, sorkariko dilenggiparangan niamko ja·rikjaenga ong·ode niamko donsrangjaon nambata ine parakataha.
“A·dokko dilenggipa manderangan niamko ja·rikjaenga ong·ode niamrangko donsrangjaon nambata. Dilgiparangan niamko manijaenga ong·ode maikai manderangko manichina aganna man·gen?” ine Sukrobar salo, Hek sing·doangaha.
A·dokni chief minister ong·e COVID-na dongimin niamrangko pe·aniara sorkarinaba namen kratcha·na nangani ong·aha ineba Hek aganaha.
“An·ching an·tangtangan dilgiparang ong·e niamko ja·rikjaenga ong·ode maikai a·dokni gipin manderangko an·ching manichina aganna man·gen? Ian sorkarina namen kratcha·na nangani katta ong·a,” ine Hek aganaha.
Niamde kangal cholgri aro ramram manderangnasan ong·aigija CM, minister aro MLA-rangnaba apsan ong·na nanga ine janapatengon, sorkario ong·aiani giminde darangba niamko pe·na bil dongja ine a·dokni gitcham Health Minister parakataha.
A·dokni dilgipa ong·e niamko pe·aniara namgija dakmesokani gita ong·aha ineba ua aganaha.
Meghalaya a·dokni Chief Minister Conrad Sangma, re·anggipa January 21 tariko COVID-19-na porikka ra·anio positive ong·ani ja·manba, January-ni 25 tariko an·tangni office-ona re·angahachim aro salgipino a·songni Republic Day-ko manianioba bakko ra·eahachim ine nikna man·a.
Indake ong·genchimoba, an·tangni kosako matnanganirangko Chief Minister jegalatskaenba, ua pilak niamrangkon ja·rikesa kamrangko ka·enga ine Bristibar salo talataniko on·angskaahachim.